Na Mwandishi Wetu, Mtanzania Digital
Waziri wa Ardhi, Nyumba na Maendeleo ya Makazi, Jerry Silaa amesema kuanzia sasa watumishi wa sekta ya ardhi nchi nzima wanaohusika na Upangaji, Upimaji na Umilikishaji watafanya kazi siku mbili ofisini na siku tatu za wiki watafanya uwandani (Site).
Waziri Silaa amesema hayo Aprili 15, 2024 wakati akifanya uzinduzi wa Kliniki ya Ardhi ya jijini Mbeya inayofanyika katika ukumbi wa Mkapa, Sokomatola mjini Mbeya.
Waziri Silaa amesema amefanya mawasiliano na Waziri wa Nchi Ofisi ya Rais TAMISEMI ili kuweka utaratibu na kuwaandikia rasmi watumishi hao wa sekta ya ardhi katika ofisi za Halmashauri.
Amesema watumishi hao wa sekta ya ardhi nchi nzima watakuwa wanafanya kazi ofisini siku za jumatatu na ijumaa na siku za jumanne, jumatano na alhamisi watakuwa wanafanya kazi wakiwa uwandani tu.
