Na CAROLINE CHALE (TUDARCO)
-DAR ES SALAAM
MKAZI wa Goba, Dar es Salaam, Marten Nyetika(49), amepandishwa kizimbani katika Mahakama ya Hakimu Mkazi Kinondoni, akikabiliwa na shtaka la kujipatia fedha kwa njia ya udanganyifu kutoka kwa Shadrack Mwamakolia.
Mbele ya Hakimu Mkazi Mfawidhi, Frank Moshi, Wakili wa Jamhuri, Ramadhani Mkimbu alidai tukio hilo lilitokea Machi 4, 2016, Wilaya ya Kinondoni, ambako mtuhumiwa alijipatia Sh milioni 20 kwa ajili ya mauziano ya eneo wakati halikuwa lake.
“Mshtakiwa unatuhumiwa kujipatia fedha kwa njia za udanganyifu, Sh milioni 20 kutoka kwa Mwamakolia kwa ajili ya mauziano ya eneo ambalo ulitambua fika kuwa halikuwa mali yako jambo ambalo ni kinyume cha sheria,” alisema Wakili Mkimbu.
Mtuhumiwa alikana mashitaka na yuko nje kwa dhamana hadi Septemba 18, mwaka huu itakapotajwa tena.
