NAIROBI, KENYA
MAOFISA watano wa polisi wameuawa baada ya mshukiwa wa ugaidi kumpokonya askari bunduki na kuwafyatulia risasi.
Mshukiwa huyo alikuwa amefungiwa korokoroni baada ya kukamatwa kwa tuhuma za kujaribu kuwashawishi watu kujiunga na mtandao wa kigaidi wa Al Shabaab.
Alipelekwa katika Kituo cha Polisi cha Kapenguria, Kaskazini Magharibi mwa Kenya.
Awali iliripotiwa kuwa mtu huyo alivamia kituo hicho ili kumnusuru mshukiwa aliyekuwa amekamatwa kwa tuhuma za ugaidi.
Mkuu wa Polisi wa kituo hicho, Vitalis Ochido, ambaye awali alitangazwa kujeruhiwa, naye amefariki dunia kutokana na majeraha.
Mkuu wa Jeshi la Polisi, Joseph Boinnet, alisema polisi zaidi wametumwa eneo hilo.
“Mshukiwa wa ugaidi aliyekuwa anashikiliwa, alitwaa bunduki na kuanza kufyatua risasi,” Boinnet amenukuliwa akisema.
