Mbunge wa Arumeru Mashariki, Joshua Nassari (Chadema), amesema ana ushahidi wa kununuliwa kwa baadhi ya madiwani wa Chama cha Demokrasia na Maendeleo (Chadema), kununuliwa na wateule wa Rais mkoani Arusha.
Aidha, amemuomba Rais John Magufuli kumuonyesha ushahidi huo endapo atahitaji kwani amekuwa akijipambanua kupambana na rushwa wakati wateule wake wanafanya bila kificho katika ofisi za umma.
“Hakuna Diwani wa Chadema aliyehama kumuunga mkono Rais Magufuli, wanaunga mkono rushwa, wanamsingizia rais kwamba wanamuunga mkono kumbe wanaunga mkono rushwa kupitia wateule wake.
“Ninao ushahidi kama rais atakuwa tayari niko tayari kumwonyesha, tuliona kwenye makinikia kwamba anayo hata ‘flash’ na mimi ninayo flash, nitamwonyesha endapo ataridhia,” Joshua Nassari
“Tulikuwa tunajua kinachokwenda kutokea jana tulijua watapokelewa madiwani wawili wa Arusha, tunajua biashara inayoendelea katika ofisi za umma, rais atakapohitaji niko tayari kukutana naye, niko tayari kukutana na Inspekta wa Polisi, Simon Sirro, Mkurugenzi wa Taaisisi ya Kuzuia na Kupambana na Rushwa (Takukuru), Mkurugenzi wa Makosa ya Jinai (DCI) na Mkurugenzi wa Usalama wa Taifa,” amesema Nassari.
Pamoja na mambo mengine, Nassari amesema endapo ushahidi wake utakuwa si kweli kuthibitisha madiwani hao hawajanunuliwa kwa rushwa yuko tayari kujiuzulu.
