NA HADIJA OMARY -LINDI
NAIBU Waziri wa Nishati, Subira Mgalu, amekataa kuwasha umeme kwenye mradi wa Wakala wa Umeme Vijijini (REA) katika vijiji vya Nangambi na Kisandi wilayani Kilwa Mkoa wa Lindi baada ya kutoridhishwa na utekelezwaji wa miradi hiyo.
Akizungumza na wananchi wa vijiji hivyo, Mgalu alieleza sababu ya kukataa kuwasha umeme huo kuwa ni udogo wa kasi ya utendaji wa kazi.
Mgalu alisema hali hiyo ilisababisha uchache wa wananchi waliofikishiwa umeme na kutokamilisha miundombinu ya umeme katika maeneo hayo.
Alisema Serikali inatafakari kama ni busara kuendelea na wakandarasi wanaozembea na kuchelewesha malengo ya kupeleka umeme kwa wananchi vijijini.
Hata hivyo, licha ya kukataa kuwasha umeme huo, Mgalu alimpa mkandarasi wiki moja kuhakikisha anamalizia kuweka miundombinu katika vijiji hivyo wananchi waanze kupata huduma.
Katibu Tawala wa Wilaya ya Kilwa, Haji Mbaruku, alisema katika mradi huo wa REA awamu ya tatu kata 10 na vijiji 25 vinatarajiwa kufikiwa.
Alisema kata hiyo ya Mingumbi ndiyo itakayonufaika zaidi na mradi huo kwa vile ina vijiji sita vitakavyopitiwa na mradi huo.
Alisema Wilaya ya Kilwa ina vijiji 90 na mpaka sasa ni vijiji 34 ndivyo vilivyounganishiwa umeme.
Naibu waziri alisema kuunganishwa kwa vijiji vingine 25 ambayo vipo katika mradi wa REA awamu ya tatu, kutafanya kufikia vijiji 59 vinavyopata huduma hiyo.
Meneja wa Tanesco Wilaya ya Kilwa, Rajabu Haule, alisema katika kitongoji cha Nangambi mkandarasi alitakiwa kujenga transifoma moja ambayo tayari imeshawekwa.
Alisema pia anatakiwa kujenga njia ya umeme LV line na service line kwa kilomita mbili na mpaka sasa mkandarasi huyo amejenga kilomita 0.35 au asilimia 17 za utekelezaji.
“Katika kitongoji hiki tulikusudia wateja 33 ambako kati ya hao wateja 30 walikuwa ni wa njia moja na wateja watatu walikuwa ni wa njia tatu lakini mpaka sasa ni wateja saba tu ndiyo waliofikiwa na umeme,” alisema.
