*Atoa mitaji kwa wajasiriamali na Wafanyabiashara wa soko hilo
Na Mwandishi Wetu, Mtanzania Digital
Rais wa Jamhuri ya Muungano wa Tanzania, Dk. Samia Suluhu Hassan ametoa Sh Bilioni 4 kwa ajili ya ujenzi wa soko la kisasa la Nzega Parking lililoko wilayani Nzega mkoani Tabora ili kuwezesha wafanyabiashara kufanya shughuli zao kwenye mazingira bora.
Rais Dk. Samia ametoa fedha hizo mapema leo Jumatano Oktoba 18, 2023 alipotembelea soko hilo kufuatia ombi la Mbunge wa Nzega ambaye pia ni Waziri wa Kilimo, Hussein Bashe kumuomba kutembelea soko hilo.
Aidha, Rais Dk. Samia amewataka wafanyabiashara hao kupisha ujenzi na kuwaelekeza Mkuu wa Wilaya na Mkurugenzi kuhakikisha soko hilo likikamilika wafanyabiashara waliopisha ujenzi ndio wapewe kipaumbele.
