Na Amina Omari, Pangani
Serikali imewataka wakandarasi wanaosimamia ujenzi wa miradi ya maji nchini kuacha siasa na kufanyakazi kwa mazoea.
Rai hiyo imetolewa na Naibu Waziri wa maji, Mhandisi Marry Prisca Mahundi wakati akiongea na wananchi wa kata ya Sakura wilayani Pangani mkoani Tanga akiwa katika ziara yake ya kukagua utekelezaji wa miradi ya maji wilayani humo.
Amewataka Wataalamu hao kuacha kufanyakazi kimazoea kwani wanakwamisha malengo ya serikali ya kuharakisha kuwapelekea maendeleo wananchi wake.
“Wakandarasi achane kufanyakazi kwa mazoea kwenye sekta ya maji tunataka matokeo bora na ya haraka ni wananchi kupata maji Safi na salama ya uhakika,” amesema Mahundi.
Kwa upande wake Mwakilishi wa Jumuiya ya watumia maji Sakura (SIBIUSO), Yusuf Ramadhani amesema mradi wa maji wa Kwakibuyu unahudumia wakazi 7780 kwa sasa ukiwa na vituo 27 vya kuchotea maji.
“Tunaiomba serikali itusaidie kukarabati miundombinu ya mradi kwa imechakaa ni ya muda mrefu na inasababisha wakati mwingine upungufu wa maji katika baadhi ya vituo” amesema Ramadhani.
