Na Mwandishi Wetu, Geita
Waziri wa Mifugo na Uvuvi, Mashimba Ndaki amewataka wakurugenzi wa halmashauri zenye masoko ya samaki ya kimataifa kuacha kupanga tozo za mazao ya uvuvi bila kuwasiliana na wizara ili kuondoa kero zinazowakumba wafanyabiashara katika maeneo hayo.
Akizungumza jana Januari 3, mara baada ya kutembelea mnada wa mifugo uliopo Kijiji cha Buzirayombo Kata ya Bukome na soko la samaki la kimataifa lililopo Kijiji cha Kasenda Kata ya Muganza, Wilaya ya Chato mkoani Geita, Waziri Ndaki amesema wizara haitaki kusikia kero za wafanyabiashara kuhusu tozo zisizo rafiki katika masoko hayo likiwemo soko la samaki la kimataifa la Kata ya Kirumba lililopo Wilaya ya Ilemela jijini Mwanza.
“Wakurugenzi walio na masoko haya ya kimataifa kwa maana ya soko la Kirumba na Kasenda, sisi wizara hatutaki kusikia kelele, mnapopanga tozo zenu hakikisheni kwa masoko haya mawili tuwasiliane ili tupange tozo ambazo zitakuwa rafiki,” amesema Ndaki
Kwa upande wake Mbunge wa Jimbo la Chato, Dk. Medard Kalemani, amemuomba Waziri Ndaki kupitia vikundi vya wavuvi vilivyosajiliwa, wizara ione namna ya kuwasaidia mikopo yenye riba nafuu pamoja na kuwanunulia nyavu ili kuacha kujihusisha na uvuvi usiofuata utaratibu.
Nao baadhi ya wavuvi na wananchi wanaofanya shughuli za kibiashara katika soko la samaki la kimataifa lililopo Kijiji cha Kasenda wamesema wanashirikiana na serikali kuhakikisha wanadhibiti uvuvi haramu.
Aidha wameipongeza Wizara ya Mifugo na Uvuvi namna inavyofanya jitihada za kuhakikisha inaboresha mazingira ya wavuvi ili sekta hiyo iweze kuwa na tija kwa wadau na hatimaye waweze kunufaika kiuchumi.
Waziri Ndaki pia amekagua ujenzi wa machinjio ya kisasa yanayojengwa katika eneo la mnada wa mifugo Kijiji cha Buzirayombo Kata ya Bukome, Wilaya ya Chato mkoani Geita.
