Na ADAM MKWEPU-DAR ES SALAAM
WAZIRI wa Habari, Utamaduni, Sanaa na Michezo, Nape Nnauye, amezishauri klabu za Simba na Yanga, kushirikiana na Serikali katika kufanya tathmini za mali zao kabla ya kuingia kwenye mapinduzi ya mifumo ya uendeshaji wa klabu hizo kwa kutumia mfumo wa hisa na kampuni.
Nnauye aliyasema hayo huku klabu ya Simba ikiwa katika mchakato wa kumilikiwa na mfanyabiashara, Mohammed Dewji ‘Mo’, kwa asilimia 51 kwa Sh bilioni 20, wakati Mwenyekiti wa Yanga akitaka kukodisha nembo ya klabu ya Yanga kwa miaka 10, akitaka majengo yabaki kuwa mali ya klabu, asilimia 25 ya faida itaingia kwa klabu lakini gharama za uendeshwaji zitakuwa chini yake.
Akizungumza na MTANZANIA jana, Nnauye alisema Serikali inaunga mkono uwepo wa mifumo hiyo na itakuwa tayari kushirikiana na klabu hizo kufanya tathmini ya mali zao, huku ikizitaka kuwa makini kabla ya kufanya uamuzi wa matumizi ya mifumo hiyo.
“Wanatakiwa kuwa makini kabla ya kuingia katika mifumo hiyo, kwani tayari tumeshuhudia wakinyoosheana vidole hivyo tunashauri michakato iwe ya wazi kwa kila hatua kwa kuwa klabu hizo ni mali za wananchi.
“Wakati wakiwa katika michakato hiyo ni vizuri kuzingatia historia ya klabu hizo, pia ni lazima mikataba hiyo iridhiwe kwa dhati si kwa ushawishi wa fedha,” alisema Nnauye.
Nnauye alizitaka klabu hizo kufuata sheria za nchi na zinazosimamia michakato hiyo, huku akisisitiza kuwa Serikali haitasita kuingilia kati iwapo kutakuwa na uvunjwaji wa sheria hizo.
“Kama michakato ikiendeshwa vizuri kwa kuzingatia sheria na mambo mengine niliyoyaeleza, jambo hili litakuwa lenye tija hata hivyo hatutasita kuingilia kati kama hakutakuwa na utaratibu wenye kufuata sheria,” alisema Nnauye.
