KHARTOUM, Sudan
JENERALI Abdel Fattah al-Burhan, ambaye hivi karibuni ndiye aliyeongoza mapinduzi ya kuing’oa Serikali iliyokuwa madarakani nchini Sudan, ametetea uamuzi wa hicho walichokifanya.
Kwa mujibu wa Jenerali, waliona wapindue Serikali kwa kuwa vilikuwapo viashiria vya vita ya wenyewe kwa wenyewe ambayo ingetokana na maandamano ya raia yaliyosababisha uharibifu mkubwa wa miundombinu.
“Hatari iliyoonekana wiki iliyopita ingeweza kuipeleka nchi kwenye vita ya wenyewe kwa wenyewe,” amesema Jenerali Burhan akiwaambia waandishi wa habari jana.
Aidha, amezungumzia hatua ya kumshikilia Waziri Mkuu wa nchi hiyo, Abdalla Hamdok, akisema walifanya hivyo kwa usalama wake kwani angeweza kudhurika kutokana na maandamano hayo yaliyotajwa kuua watu 10.
