Mwandishi Wetu -Dar Es Salaam
SHIRIKA lisilo la Kiserikali la Babawatoto (Babawatoto Organization), limetoa ya kujikinga na maambukizi ya virusi vya corona kwa watoto wanaoishi katika mazingira hatarishi.
Elimu hiyo imetolewa kwa watoto hao ikiwa ni sehemu ya kuadhimisha Siku ya Kimataifa ya Mtoto anayeishi na Kufanya kazi Mtaani ambayo huadhimishwa Aprili 12 kila mwaka.
Mkurugenzi wa shirika hilo, Mgunga Mwamnyenyelwa amesema lengo la siku ni kujenga ushawishi kwa wanajamii na serikali kuwekea mkazo zaidi suala la haki na ustawi wa watoto wakiwamo wanaoishi na kufanya kazi mtaani.
“Maadhimisho ya mwaka huu yameanza Aprili 8, lakini kutokana na changamoto ya ugonjwa ya corona kama shirika tumelezimika kuwakumbuka watoto wa mtaani kuwapa elimu.
“Lakini yale ya msingi kwa Jamii tumekuwa tukitumia vyombo vya habari kuwafikishia ujumbe wanajamii badala ya kuwakusanya watoto pamoja kama zamani, hii ni njia pia ya kuwalinda na ugonjwa huo hatari,” alisema Mgunga.
Pamoja na mambo mengine alisema shirika la Babawatoto linatekeleza mradi wa ‘Kizazi Kipya’ ambao unalenga kutetea haki za watoto na vijana wanaoishi na kufanya kazi mtaani ikiwa ni pamoja na kutoa huduma za Kibinadamu kama afya ikiwamo kupima Virusi Vya Ukimwi (VVU) na kuhudumia wenye VVU na Ukimwi, kuwapa chakula na elimu ya msingi na ufundi ili hatimaye wajitoe kwenye maisha ya mtaani.
Alisema mradi huo ambao uko chini ya Pact Tanzania na Railway Children Africa (RCA) kwa ufadhili wa mashirika ya misaada ya USAID la Marekani na UKAID la Uingereza tangu mwaka 2017 umehudumia jumla ya watoto 1,914 wakiwamo wasichana 352 na wavulana 1,562 ambao wengine waliunganishwa na wanafamilia.
“Ujumbe wa mwaka huu unaitaka jamii kutambua kwamba watoto wote wanastahili kujisikia kuwa salama hivyo jamii yote iwajibike, watoto wana haki ya kulindwa dhidi ya vurugu na manyanyaso pasipo kujali wanatoka katika maisha ya aina gani, jamii kuchukua hatua zaidi katika kuwezesha ulinzi wa mtoto anayeishi mtaani kwani maranyingi mtoto huyu husahaulika,” alisema Mwamnyenyelwa.
