Na MWANDISHI WETU DAR ES SALAAM
ALIYEKUWA Mwenyekiti wa Umoja wa Wanawake wa CCM (UWT) Wilaya ya Ilala, Nora Waziri maarufu kama Nora Mzeru, jana alifikishwa katika Mahakama ya Wilaya ya Ilala akidaiwa kughushi cheti cha ndoa.
Ilidaiwa na Wakili wa Serikali, Ester Kyara, mbele ya Hakimu Mkazi, Flora Haule kuwa mshtakiwa alitenda kosa hilo kwa kugushi cheti cha ndoa namba ya usajili 00040078 kwa nia ya kuonyesha kwamba alifunga ndoa na Silvanus Mzeru.
Wakili alidai katika siku isiyojulikana Dar es Salaam, kwa nia ya kudanganya, mshitakiwa alighushi cheti hicho kuonyesha kuwa alifunga ndoa na Mzeru Februari 4,1995 katika Kanisa Katoliki la Mburahati wakati si kweli.
Mshtakiwa alikana mashitaka na Hakimu Haule alitoa masharti ya dhamana ambapo mshitakiwa alitakiwa kuwa na wadhamini wawili watakaosaini bondi ya Sh milioni mbili.
Mshtakiwa aliachiwa huru kwa dhamana hadi Novemba 21 mwaka huu kesi hiyo itakapotajwa tena.
