Juliana Samweli,TUDARCO
Waziri wa Habari Sanaa,Utamaduni na Michezo, Innocent Bashungwa, wizara yake imeizawadia timu ya Taifa ya Tanzania, Taifa Stars fedha sh. Milioni 10 baada ya kuibuka na ushindi wa mabao 3-2 dhidi ya Madagascar katika wa kufuzu Kombe la Dunia uliochezwa jana Uwanja wa Taifa, Dar es Salaam.
Akizungumza leo Septemba 8, katika tamasha la utamaduni jijini Mwanza, Bashungwa amesema wametoa zawadi hiyo ili kuongeza hamasa kwa wachezaji.
“Mdau yeyote anayetaka kutoa zawadi ya hamasa kwa Taifa Stars, naomba iwasiliane na wizara ili kuitambua, hongereni sana Taifa Stars na Watanzania wote,” amesema Bashungwa.
Amesema katika kuendeleza sekta ya michezo nchini, amewaomba Watanzania kuendelea kuiunga mkono timu ya Taifa ili kufanya vizuri kwani Rais Samia Suluhu Hassani ameweka mazingira mazuri ya kukuza michezo.
Aidha ameeleza kuwa katika Mkoa wa Mwanza kuna mipango mizuri ya kuboresha Uwanja wa CCM Kilumba ili jitihada za kufufua timu ya Pamba ziendane na miundombinu.
