Na Mwandishi Wetu, Dar es Salaam
Taasisi ya Msichana Initiative na wadau mbalimbali wanaotetea haki za wanawake wameiomba Serikali kupitia bunge kuleta mswaada wa mabadiliko ya sheria ya ndoa ili kulinda haki za mtoto wa kike dhidi ya ndoa za utotoni
Akizungumza wakati wa mkutanonhuo leo Jijini Dar es salaam Mkurugenzi wa Taasisi ya Msichana Ininiative, Rebeca Gyumi, amesema lengo la Mkutano huo ni kujadili namna bora ya kuunganisha nguvu za pamoja ili kuishawishi Serikali.
“Kwa pamoja tukishawishi Serikali kupitia bunge ili kuleta mswaada wa mabadiliko ya sheria ya ndoa ili kulinda haki za mtoto wa kike dhidi ya ndoa za utotoni kwani kuna mkanganyiko katika sheria ya mtoto na sheria ya ndoa.
“Mkanganyiko uliopo ni kwamba sheria ya mtoto imebainisha kuwa mtoto ni mtu yoyote mwenye umri chini ya miaka 18 wakati sheria ya ndoa inaruhusu msichsna wa miaka 14 kuolewa jambo ambalo unaonesha mtoto wa kike chini ya miaka 18 anaruhusiwa kuolewa kisheria.” amesema Rebeca
Kwa upande wake Mkurugenzi Mtendaji wa Mtandao wa Jinsia Tanzania TGNP Lilian Liundi, amesema mchakato wa mabadiliko ya sheria ya ndoa unahitaji nguvu za pamoja ili kulinda haki za mtoto wa kike hivyo amezitaka Taasisi na asasi za kiraia kushiriki mchakato huo ili kuzuwia mimba za utotoni.
Naye Nuria Mshale kutoka Shirika la save the Children amesema ni jukumu la kila mtu kwa nafasi yake ikiwemo Wabunge kupiga vita uwepo wa sheria ya ndoa inayoruhusu mtoto wa kike chini ya miaka 18 kuolewa kwani inamkosesha haki nyingi mtoto wa kike.
Katika Mkutano huo uliofanyika Jijini Dar es salaam na kukutanisha zaidi ya mashirika 70 na asasi mbalimbali zinazoshughulikia haki za wanawake ikiwemo Mtandao wa Jinsia Tanzania TGNP, Chama cha wanasheria wanawake TAWLA pamoja na Save the Children ili kujadili changamoto za sheria ya ndoa huku lengo likiwa ni kumlinda mtoto wa kike dhidi ya ndoa za utotoni.
