Na Mwandishi Wetu, Mtanzania Digital
Kampuni ya Bia ya Serengeti (SBL), ambayo ni moja wa wazalishaji wakubwa wa bia nchini, imefichua kuwa inalenga kuongeza vyanzo vyake vya malighafi kutoka kwa wakulima wadogo hadi kufikia asilimia 85% ya jumla ya malighafi zake katika mwaka wa fedha ujao wa, 2024/25.
SBL, ambayo itaanza mwaka wake wa fedha wa 2024/25 Julai, Mwaka huu, kwa sasa inapata 70% ya malighafi zake kutoka kwa wakulima wa ndani ambao wako chini ya mpango wa kilimo cha mkataba na kampuni ya bia.
Kampuni hiyo ilianza kushirikisha wakulima katika mfumo wa kilimo cha mkataba miaka kumi iliyopita, mwaka 2013, ambapo wakulima hutoa malighafi kama vile mahindi, shayiri, na mtama kwa kampuni hiyo ya bia.
SBL inawavutia wakulima wa ndani kushiriki katika mpango huo kama njia ya kuwawezesha kwa kuwapatia mafunzo ya kilimo na vifaa vya kilimo kama mbegu na mbolea, vilevile kuwawezesha kupata huduma za bima ya mikopo.
Mbali na mipango ya kuongeza uwezo wa kupata malighafi kutoka kwa wakulima wadogo, SBL itachunguza uwezekano wa kuongeza idadi ya mikoa ambayo kampuni ya bia inapata malighafi kutoka. Kwa sasa, SBL inashirikiana na wakulima wadogo katika mikoa saba ambayo ni Manyara, Arusha, Kilimanjaro, Mwanza, Mara, Singida, na Shinyanga.
Akielezea juu ya mpango huo ambao unatekelezwa chini ya nguzo ya “Kutoka Kwenye Nafaka Mpaka kwenye Glasi” ya SBL, Meneja wa Mawasiliano na Uendelevu wa SBL, Rispa Hatibu amesema, “Chanzo kikuu cha malighafi yetu kwa ajili ya uzalishaji kinatokana na mazao ya kilimo, hivyo tumekuwa tukifanya kazi kwa karibu katika ushirikiano na wakulima wetu wadogo wa ndani ili kupata malighafi kutoka kwao.
Kupitia mkataba huu, tunashirikisha wataalam wetu wa kilimo kuwajengea wakulima wetu wadogo ujuzi wa kilimo na kuwapatia pembejeo muhimu za kilimo ili waweze kuzalisha nafaka za kutosha ambazo zina viwango vinavyotakiwa.
Aliongeza kwa kusema, “Hatimaye, wakulima wana uwezo wa kuzalisha mavuno ya kutosha ambayo wana masoko tayari, kimsingi tunachukulia mpangilio huu kama ushirikiano wa kushinda-kushinda.”
Msaada wa SBL unategemea kuwezesha mafunzo kwa wakulima wadogo wanaofanya kazi na kampuni ya bia, kununua pembejeo za kilimo, na kuwezesha mipango ambayo itawawezesha wakulima wadogo kufanya kilimo kwa njia endelevu zaidi, ikiwa ni pamoja na mazoea ya kilimo endelevu na mengineyo.
Kutokana na mafanikio kama hayo, ambayo yanawanufaisha SBL na wakulima wadogo, kampuni hiyo itaendelea kuwekeza katika maendeleo ya wakulima wadogo kwa kuwawezesha kufanya kilimo endelevu na kuboresha sekta ya kilimo kwa ujumla.
“Nia yetu ya kuongeza idadi ya wakulima wanaoshirikiana nao na hata kufikia mikoa zaidi, inakwenda sambamba na juhudi zetu za kuchangia katika sekta ambayo ni uti wa mgongo wa uchumi wa nchi yetu,” alifafanua Hatibu.
Zaidi ya wakulima wadogo 400 katika mikoa saba ambapo SBL inashirikiana na wakulima wamekuwa wakinufaika na mpango wa kilimo cha mkataba wa kampuni ya bia. SBL inatarajia kuongeza idadi ya wakulima wadogo katika mwaka wake wa fedha ujao na kuongeza asilimia.
Akifafanua zaidi juu ya uwekezaji wa kampuni ya bia katika kilimo kwa ujumla, mbali na mpango wa kilimo cha mkataba, Hatibu alisema SBL imekuwa ikitekeleza kwa mkakati programu ya udhamini kwa wanafunzi kutoka kaya maskini ambao wanafuatilia masomo ya kilimo katika vyuo kwa lengo la kuwajengea ujuzi sahihi wa kilimo.
Programu hiyo inayojulikana kama Kilimo Viwanda ni yenye manufaa kwa wanafunzi kutoka familia za wakulima. Kupitia programu ya udhamini, SBL inagharamia gharama zote za masomo kwa wahusika.
