Na ASHA BANI-DAR ES SALAAM
MWANASIASA mkongwe na Meya wa zamani wa Jiji la Dar es Salaam, Kitwana Kondo (88), amefariki dunia.
Mtoto mkubwa wa kiume wa mwanasiasa huyo, Adinan Kondo alisema kuwa baba yake alifariki dunia jana saa 11 jioni katika Hospitali ya Hindu Mandal, Dar es Salaam.
Mwanasiasa huyo ambaye alikuwa maarufu kwa jina la ‘KK’, awali alikuwa akisumbuliwa na kiharusi kilichompata tangu mwaka 2013.
Adinan alisema baba yake walimkimbiza hospitalini hapo kwa matibabu na kulazwa baada ya kuzidiwa.
Viongozi mbalimbali walifika hospitalini hapo kumjulia hali akiwamo Rais mstaafu Jakaya Kikwete na aliyekuwa Waziri Mkuu Mizengo Pinda.
Wengine ni Waziri mkuu wa zamani, Edward Lowassa na Rais mstaafu wa awamu ya pili, Ali Hassan Mwinyi, ambaye alikuwa akienda hospitalini hapo mara kwa mara.
Kitwana Kondo ni miongoni mwa wanasiasa mashuhuri nchini ambaye ambaye pia aliwahi kuwa mbunge wa Kigamboni kuanzia mwaka 1995 hadi 2000 kupitia tiketi ya Chama Cha Mapinduzi (CCM).
Katika uchaguzi mkuu wa mwaka 2000, alishindwa kutetea nafasi yake kwa kubwagwa na Frank Magoba wa Chama cha Wananchi (CUF) ambaye kwa sasa amejiunga na CCM.
Februari 2, 1999 Kitwana Kondo akiwa Mbunge wa Kigamboni, alisimama ndani ya Bunge na kutoa hoja ya kuitaka Serikali iondoe kero zinazowasibu Waislamu na makundi yote ya wanaharakati ya Kiislamu.
Vilevile kwenye miaka ya 1990 alikuwa mmoja wa viongozi waliozima hatua ya kuvunjwa mabucha ya nguruwe katika eneo la Kigogo kwa kufanya mazungumzo na viongozi wa dini ya Kiislamu akiwamo marehemu Sheikh Kassim Bin Jumaa, aliyekuwa imamu wa Msikiti wa Mtoro.
Akizungumzia msiba huo jana, Mbunge wa Kigamboni Dk.Faustine Ndugulile (CCM), alisema amepokea kwa masikitiko taarifa za msiba huo ambao kwake ni mkubwa.
Alisema Kondo alikuwa mtangulizi wake na hata katika harakati za kugombea ubunge aliwahi kupata ushauri kwake.
“Tumepokea kwa masikitiko makubwa msiba huo kwa sababu siyo tu kwa kuwa aliwahi kuwa meya lakini pia alikuwa mtangulizi wangu katika jimbo la Kigamboni.
“Nawapa pole wafiwa wote na pia wana CCM wa Mkoa wa Dar es Salaam,’’alisema Dk. Ndugulile.
