LAS VEGAS, Marekani
BONDIA wa Uingereza, Amir Khan, ameibuka na kutamba kuwa yupo kwenye malengo ya kushinda mpambano wake dhidi ya Saul ‘Canelo’ Alvarez, utakaochezwa Las Vegas, Marekani.
Khan (29) ambaye anatarajia kupanda ulingoni Mei 7 mwaka huu katika uzito wa kati, alisema mazoezi yake yanaendelea vizuri kuelekea pambano hilo.
Khan na Alvarez tayari wapo kwenye kambi zao zilizopo Oakland na San Diego, wakijifua kabla ya pambano hilo litakalochezwa kwenye uwanja wa T-Mobile Arena, Las Vegas, Marekani
Nyota huyo alijigamba kufanya mazoezi kwa lengo la ushindi na kuongeza kuwa anatarajia ushindi wa kishindo dhidi ya mpinzani wake huyo.
Alvarez, ambaye ni mshindi wa mkanda wa WBC wa uzito wa kati baada ya kumdunda Miguel Cotton Novemba mwaka jana, anatarajia pia kutetea taji lake.
Nyota huyo alimkanya Khan na kumtahadharisha kwamba pambano hilo litakuwa gumu ingawa kila bondia anatarajia ushindi.
