NA KOKU DAVID, DAR ES SALAAM
FAMILIA ya aliyekuwa Mbunge wa Viti Maalumu kupitia Chama cha Demokrasia na Maendeleo (Chadema), Leticia Nyerere, imesema baada ya kukamilisha majadiliano inatarajia kutoa tamko la kifamilia Januari mosi.
Akizungumza na MTANZANIA jijini Dar es Salaam, msemaji wa familia ya Msobi Mageni, John Shibuda, alisema kwa sasa haina cha kuzungumza na kwamba baada ya kukaa ndipo itakuwa na neno la kusema.
Alisema mgonjwa bado yupo hospitali na kwamba familia ndiyo itakayoamua kuhusu nini kifanyike au hatua gani ichukuliwe.
“Kwa sasa familia haina chochote cha kuongea kuhusu mgonjwa, lakini baada ya kukutana kama familia tunatarajia kutoa neno siku ya Ijumaa,” alisema Shibuda.
Hata alipoulizwa kuhusu hali ya mgonjwa huyo, alikataa kusema na kusisitiza kuwa taarifa zote zitatolewa Ijumaa.
Mbunge huyo ambaye Julai 27 mwaka huu alitanganza kuhama Chadema na kurejea Chama Cha Mapinduzi (CCM) amelazwa katika chumba cha wagonjwa mahututi (ICU) katika Hospitali ya Doctors Community iliyopo Maryland nchini Marekani.
