NA MWALI IBRAHIM
WAIMBAJI mahiri wa taarabu nchini kutoka kundi la Coast Taarabu, Maua na Omary Tego, wanatarajia kuwatambulisha watoto wao kwenye ulimwengu wa muziki huo katika onyesho lao maalumu litakalofanyika Jumatano katika ukumbi wa Equator Grill, Mtongani Dar es Salaam.
Shoo hiyo inayoitwa ‘Vijukuu wa Tego’ itapambwa na burudani kutoka kwa bendi kongwe ya muziki wa dansi nchini, Msondo Ngoma, Malkia wa Mipasho, Khadija Kopa, Jokha Kassim, Msaga sumu na Dar Modern Taarabu.
Mkurugenzi wa kundi hilo, Omary Tego, alisema usiku huo utaambatana na utambulisho wa nyimbo zao mbili mpya ambapo mashabiki wao watapata nafasi kwa mara ya kwanza kuzisikiliza.
“Sasa tumekuja kivingine tunawaleta watoto wetu nao waonyeshe vipaji vyao walivyojaliwa katika muziki huo, pia mashabiki watapata burudani mbalimbali ikiwa ni pamoja na kusikiliza nyimbo zetu mpya ambazo tumewaandalia kama zawadi kwao,” alisema Maua.
