Na Mwandishi Wetu, Mtanzania Digital
JUKWAA la muziki la Apple Music, linasherehekea uzuri wa kipekee na mandhari ya Bara la Afrika kupitia muziki katika Africa Month (Mwezi wa Afrika) unaokwenda sambamba na kampeni maalum ya Africa Is… yenye lengo la kuuenzi na kuutangaza ubunifu na vipaji vya muziki vya Kiafrika.
Kampeni ya Africa Is… itawashirikisha mastaa kibao wa muziki kutoka nchi za Afrika Mashariki, Magharibi, Kati na Kusini ambapo wasanii wakubwa takribani 18 wataonesha maana halisi ya kuwa Mwafrika.
Miongoni mwa wasanii watakaoshiriki kwenye kampeni hiyo kutioka Afrika Magharibi ni pamoja na Rema (Nigeria), Moliy (Ghana) Basketmouth (Nigeria) Kelvyn Boy (Ghana), Prince Gyasi (Ghana) na Andrea Iyamah (Nigeria).
Kwa upande wa Afrika Mashariki, wasanii watakaoshiriki kampeni hiyo ni pamoja na Chimano (Kenya) na Hussein Suleiman (Uganda) huku nchi zinazozungumza Kireno zikiwakilishwa na Soraia Ramos (Cape Verde) na Eliana Murargy wa Msumbiji.
Nchi zinazozungumza Kifaransa zitawakilishwa na Ferre Gola (DRC), Serge Ibaka (DRC) na Chrystel (Ivory Coast) na upande wa Afrika Kusini ikiwakilishwa na Bongeziwe Mabandla, Uncle Waffles, Slikour, Nduduzo Makhathini na Wanda Lephoto.
Pia Apple Music watakuwa na vipengele vingine kama playlist za Editorial, Genre, Artist Essentials na Behind The Boards pamoja na Exclusive Home Sessions.
“Kwangu mimi, Afrika, kama ulivyo muziki wetu, ni tajiri, wenye rangi za kuvutia na mandhari nzuri. Tunajua namna ya kufurahi. Tunajua namna ya kuleta mwangaza wa burudani kwenye chumba chenye giza, huku tukiutunza utu wetu na muziki wetu.
“Najua kampeni hii haitoshi kuwakilisha muziki wote wa Afrika lakini ni kitu kikubwa sana,” alisema Rema, ambaye ni miongoni mwa washiriki kutoka Nigeria.
