Mkuu wa Mkoa wa Kilimanjaro Anna Mghwira ametembelea hospitali ya wilaya ya Hai na kuwajulia hali wanafunzi watatu wa shule msingi Kibohehe waliojeruhiwa wakati wa tukio la kuezuliwa paa la shule hiyo kutokana na mvua iliyoambatana na upepo .
Wanafunzi  hao waliojeruhiwa sehemu mbalimbali za mwili ni Mary Herieli Swai (11), Aloyce Abeli (13) na Lukana Abuu (9) wote wanasoma darasa la tatu katika shule hiyo.
Mghwira aliwatembelea watoto hao baada ya ukaguzi wa shule hiyo ambapo alisikitishwa na ujenzi usiokidhi vigezo uliosababisha hasara pamoja na kumpoteza mwanafunzi wa darasa la sita Derich Albarth.
Mkuu huyo wa Mkoa aliwapa pole wanafunzi wote watatu pamoja na Wazazi wao waliokuwa wakiwauguza na kuwataka kuwa wavumilivu wakati serikali ikiendelea na uchunguzi ili kubaini chanzo halisi ili wahusika wachukiliwe hatua.
Wanafunzi hao wanaendelea na matibabu na hali zao zinaendelea kuimarika
