Aveline Kitomary, Dar es salaam
Baadhi ya wazazi wamelalamikia kupanda kwa bei ya vifaa vya shule katika soko la Kariakoo jijini Dar es salaam kuelekea kipindi hiki cha kufunguliwa kwa shule.
Akizungumza na Mtanzania Digital kwa leo Jumatatu Desemba 31, mmoja wa wazazi hao Mariam Salmin amesema awali vifaa hivyo vilikua vinauzwa kwa bei ya chini lakini kipindi hiki cha kueleka kufunguliwa kwa shule bei zimepanda mara mbili.
Mariam amesema wanawaomba wafanyabiashara wapunguze bei ya vifaa na wauze kama walivyokuwa wanauza mwazo.
“Nimeulizia bei ya shati hapa wameniambia ni Sh. 12,000 nimeshindwa hata kununua, hapa naenda kuongeza hela nirudi tena kununu,”amesema Mariam.
Bei ya vifaa imepanda ambapo shati la shule aina ya ‘Tomato’ ilikuwa inauzwa kuanzia Sh. 6,000 hadi 8,000 kwa sasa linauzwa kuanzia Sh. 10,000 hadi 12,000, bei ya viatu ilikuwa Sh. 5000 hadi 10000 sasa wanauza shilingi 15,000 hadi 30,000 huku bei ya madaftari makubwa aina ya ‘Counter book’ ilikuwa inauzwa Sh. 2,000 kwa sasa linauzwa Sh 3,000.
