NA GUSTAPHU HAULE
UTAFITI wa viashiria vya maambukizi ya virusi vya Ukimwi umeanza mkoani Pwani huku kaya zilizoainishwa kufanyiwa utafiti huo zikitakiwa kutoa ushirikiano ili ukamilike kwa wakati.
Meneja Takwimu wa Mkoa wa Pwani, Kalisto Lugome, alikuwa akiwaeleza waandishi wa habari jinsi utafiti huo utakavyotekelezwa.
Lugome alisema Mkoa wa Pwani umepata kipaumbele cha kufanyiwa utafiti huo kutokana na kuwapo idadi kubwa ya maambukizi ya virusi vya Ukimwi yaliyofikia asilimia 7.2 wakati wastani kwa taifa ni asilimia tano.
Alisema utafiti huo utafanyika katika halmashauri zote za mkoa katika kaya 37 zilizoanishwa.
Lugome alisema hivi sasa timu ya wahamasishaji imeanza kupita katika maeneo hayo kufanya maandalizi.
“Utafiti wa viashiria vya maambukizi ya virusi vya Ukimwi sasa umeingia mkoani kwetu.
“Tunawaomba wananchi katika kaya zilizoanishwa kutoa ushirikiano kuweza kukamilisha hatua hiyo kwa wakati,” alisema.
Awali akizindua hatua hiyo, Mkuu wa Mkoa wa Pwani, Evarist Ndikilo, alisema utafiti huo utaisaidia Serikali hususan watunga sera, kuandaa mikakati mipya ya kudhibiti Ukimwi na kuimarisha mipango ya ufuatiliaji.
Ndikilo alisema takwimu hizo zitasaidia pia kuboresha juhudi zinazofanywa na Serikali kusogeza huduma za VVU katika vituo vya afya ikiwamo huduma ya mama kwenda kwa mtoto.
Hata hivyo, aliwataka waganga wakuu wa halmashauri hizo na watendaji wote waweke mazingira mazuri ya kuhakikisha watafiti hao wanafanya kazi yao kulingana na matakwa ya Serikali.
