Zaidi ya watoto 197 wenye matatizo ya vichwa vikubwa na mgongo wazi wamefanyiwa upasuaji kwa ushirikiano wa kampuni ya GSM na Taasisi ya Mifupa na Mishipa ya Fahamu (MOI).
Kaimu Mkurugenzi wa taasisi hiyo Dk.Othman Kiloloma, alisema watoto waliofanyiwa upasuaji ni awamu ya pili ya kampeni ya kusaidia watoto wenye vichwa vikubwa inayofadhiliwa na GSM na tayari wameshafanyia upasuaji watoto kwa mikoa tisa.
Alisema mbali na kufanya upasuaji waliweza kuwafanyia vipimo watoto 800 wenye matatizo mbali mbali wakiwemo wa vichwa vikubwa.
Dk. Kiloloma alisema taasisi yao inatarajia kufanya tena upasuaji wa watoto wenye matatizo ya vichwa vikubwa na mgongo wazi kwa awamu ya tatu ambapo wanatarajia kutembelea mikoa mitano.
Alisisitiza kuwa mtoto mwenye kichwa kikubwa na mgongo wazi kama atawahishwa hospitali mapema na kuonwa na madaktari upo uwezekano mkubwa wa kuokoa maisha yake.
