Na Winfrida Mtoi
Kanisa la Evangelistic Assemblies of God (E.A.G.T), Temeke linatarajia kufanya semina na maombi maalumu kuliombea Taifa, viongozi pamoja na kuomba ili kuondokana na tatizo la watoto kupotea.
Semina hiyo inatarajiwa kufanyika Agosti 4 -11,2024, viwanja vya Temeke Chang’ombe jijini Dar es Salaam, huku neno kuu likiwa ‘ Yote Yanawezekana kwa Mungu Wetu’.
Akizungumza na waandishi wa habari leo Julai 30, 2024, Mchungaji wa Kanisha hilo Christomoo Ngowi, amesema maombi hayo pia yatahusu vijana kutokana na kuporomoka kwa maadili na vijana wengi kujiingiza katika matumizi ya dawa za kulevya.
“Sasa hivi mabadiliko yanayotokea ni makubwa hali ni mbaya vijana wameharibika, wanatumia dawa za kulevya, si sheria zinaweza kuwarudisha katika maadili bali ni Mungu mwenye uwezo wa kubadilisha tabia ya mtu,” amesema Mchungaji Ngowi.
Amewakaribisha watu wa dini zote katika semina hiyo ambapo kutakuwa na waimbaji kama vile John Lissu, Joel Lwanga, Boaz Danken na kwaya nyingine ikiwamo ya kanisa hilo.
