RAMADHAN HASSAN-CHAMWINO
KATIBU wa Chama cha Viziwi Mkoa wa Dodoma (CHAVITA), Amina Issa amesema kukosekana kwa mawasiliano ya lugha ya alama kunasababisha wenye ulemavu wa kutosikia kukosa haki zao za msingi.
Hayo yalielezwa mwishoni mwa wiki na katibu huyo alipozungumza na waandishi wa habari kuhusiana na umuhimu wa mawasiliano ya lugha ya alama kwa watumishi wa serikali.
Alisema changamoto ya kukosekana kwa lugha hiyo ya alama kunawafanya kuendelea kukosa mahitaji yao muhimu kwenye sekta hizo kama wanavyopatiwa watu wengine wasiokuwa na ulemavu.
“Tunaiomba serikali kutenga bajeti kwa ajili ya watumishi wao waweze kujifunza lugha ya alama ambayo itawawezesha kuwa na mawasiliano na sisi tunapohitaji kupatiwa mahitaji mbalimbali kwenye taasisi husika zikiwamo za benki, hospitali, mahakamani, polisi na katika majengo ya serikalini,” alisema .
Amina aliwataka vijana wa chama hicho cha viziwi Mkoa wa Dodoma kuunda vikundi waweze kukopeshwa na taasisi za fedha zitakazowawezesha kujiinua mapato zaidi badala ya kutegemea ufadhili ambao hauna uhakika kwa asilimia kubwa.
Kwa mujibu wa Amina, wakiungana itakuwa rahisi kuibua miradi ambayo itakayoweza kuondokana na dhana ya utegemezi kwa watu na wafadhili ambao kwa asilimia nyingi umekuwa ukiwafanya kuwa masikini.
Alisema hivi sasa serikali imetoa fursa nyingi za kujiajiri wenyewe ikiwamo na vitambulisho ambavyo vitafanya kufanya shughuli mbalimbali za kujipatia kipato bila kubugudhiwa watakapokuwa na vikundi hivyo vya ujasiriamali.
