NA THERESIA GASPER, DAR ES SALAAM
MSHAMBULIAJI wa timu ya soka ya Yanga, Amissi Tambwe, amesema hawawezi kukata tamaa ya kutinga nusu fainali ya michuano ya Kombe la Shirikisho Afrika licha ya kupoteza michezo miwili mfululizo katika Kundi A.
Mabingwa hao wa Ligi Kuu Tanzania Bara ambao waliingia hatua ya makundi baada ya kuiondosha Sagrada Esperanca ya Angola hatua ya 16 bora, walifungwa bao 1-0 na Mo Bejaia ya Algeria ugenini kabla ya kuchapwa bao 1-0 na TP Mazembe ya Jamhuri ya Kidemokrasia ya Congo (DRC).
Akizungumza na MTANZANIA jana, Tambwe alisema licha ya mechi hizo kuwa ngumu watajipanga kwa michezo iliyobaki ili wapate matokeo yatakayowafikisha hatua hiyo kwani nafasi wanayo.
“Tunaomba mashabiki waendelee kutupa sapoti, pia tunawahakikishia matokeo yatakuwa mazuri kuanzia mchezo dhidi ya Medeama ya Ghana utakaochezwa Julai 15, mwaka huu,” alisema.
