NA OSCAR ASSENGA, TANGA
OFISI ya Watumishi katika Bohari ya Madawa Kanda ya Tanga (MSD) imeteketea kwa moto baada ya kutokea hitilafu ya umeme jana saa kumi alfajiri na kusababisha hasara ya zaidi ya Sh milioni 20.
Akithibitisha kutokea kwa moto huo jana, Meneja wa MSD Kanda ya Tanga, Mwanasheha Jumaa, alisema tukio hilo limewashtua, hasa tangu alipopata taarifa za moto huo kutoka kwa walinzi.
Mwanasheha alisema baada ya walinzi hao kufahamu tukio hilo walijitahidi kuanza kuuzima moto huo ambao ulikuwa ukiendelea kusambaa kwenye baadhi ya maeneo kwenye ofisi hiyo na kufanikiwa kuuzima.
Alivitaja vitu vilivyoungua kwenye ofisi hiyo kuwa ni mifumo ya mawasiliano ya intaneti, vipoza joto na samani za ofisi.
Alisema chanzo cha moto huo ni hitilafu ya umeme.
“Tukio hili limetusikitisha sana na kutuacha hatuna kitu kwenye ofisi hii ya watumishi, kama unavyoona hivyo sasa tunajipanga kuhakikisha jambo hili halijitokezi tena,” alisema Mwanasheha.
