NICE, UFARANSA
MSHAMBULIAJI wa timu ya Nice, Mario Balotelli, amedai kutomtambua kocha wa timu yake ya zamani ya Liverpool, Jurgen Klopp, ambaye alimtimua katika timu hiyo.
Balotelli alisajiliwa na kocha wa zamani wa timu hiyo, Brendan Rodgers, mwaka 2015 akitokea timu ya AC Milan lakini alishindwa kuwa na ushawishi kwa kocha huyo na kurejea Milan kwa mkopo wa muda mfupi.
Nyota huyo anayecheza timu ya Nice amefunga mabao sita katika michezo mitano ya kwanza ya Ligi Kuu Ufaransa ya msimu huu, baada ya kusajiliwa dirisha lililopita akiwa mchezaji huru.
Balotelli alisema hakuna nafasi ya kurejea katika timu ya Liverpool baada ya Klopp kudai wapo tayari kumpokea nyota huyo baada ya kurejea katika kiwango chake.
“Klopp? Simjui, aliniambia niondoke Liverpool kwa mkopo na kurejea lakini nikamwambia hakuna kitu kama hicho.
“Wakati nikiwa katika klabu hiyo sikuwa na uhusiano mzuri na Klopp na hata alivyonitimua na kuniambia nitarejea sikuwa tayari na jambo hilo,” alisema Balotelli.
