NA FESTO POLEA
ANAYESHIKILIA taji la ushindi la Bongo Star Search (BSS) 2015, Juma Kayumba, ambaye anatamba na wimbo wa ‘Katoto’ amesema hatarudia makosa aliyofanya katika wimbo wake wa Kitoto.
Kayumba aliliambia MTANZANIA kwamba yupo mbioni kufanya video ya wimbo wake mpya wa ‘Dengua’ ambao bado haujaachiwa popote akiamini kwamba amejifunza mengi katika video yake ya kwanza.
“Nimejifunza kitu katika video ya ‘Katoto’ maana sikuwa nikijua kinachoendelea nililetewa mwanamke mkubwa ingawa alicheza vizuri katika video yangu lakini hatukulingana yeye ni mkubwa sana kwangu hivyo katika video hii mpya nitatafuta msichana tunayelingana ili aendane vyema na hadithi ya wimbo wenyewe.
“Wimbo ni wa mapenzi unataka kuwe na msichana atakayekuwa akiringa na kudengua, bado sijajua kama nitasafiri kwenda Afrika Kusini au nitapiga picha zake hapa hapa Dar,” alisema Kayumba akidai ataanza harakati hizo mwishoni mwa mfungo wa Ramadhani.
