Na Mwandishi Wetu, Dodoma
WAZIRI MKUU, Kassim Majaliwa ameyaomba mashirika ya kimataifa na nchi zilizoendelea zishirikiane na Serikali ya Tanzania katika kuwahudumia wakimbizi.
Aliyasema hayo katika mazungumzo na Naibu Waziri Mkuu na Waziri wa Mambo ya Nje wa Ubelgiji, Dibr Reynders, Dodoma jana.
“Kwa sasa tunashirikiana na Umoja wa Mataifa kuwahudumia wakimbizi, hivyo tunaomba mataifa mengine nayo yatu-support katika jambo hili,” alisema.
Alisema Tanzania inahifadhi wakimbizi 165,000 kati ya 230,000 walioko katika nchi za Maziwa Makuu, ambako bajeti ya Serikali haitoshelezi kuwapa huduma wanazostahili.
Waziri Mkuu alisema wakimbizi hao wanaishi kwenye kambi mbalimbali nchini zikiwamo za Nyarugusu na Nduta wilayani Kasulu na Kibondo ambazo alizitembelea Desemba mwaka jana.
Alisema wakimbizi hao wanakabiliwa na changamoto mbalimbali zikiwamo za uhaba wa maji safi, ufinyu wa huduma za afya na elimu na uharibifu wa mazingira .
Aliwataja wakimbizi hao kuwa ni raia wa Burundi, Kongo na Rwanda.
Pia alimuomba Reynders atakapofika Burundi akahamasishe amani.
Majaliwa alisema Tanzania inakaribisha wawekezaji kutoka nchini Ubelgiji na mataifa mengine kuja kuwekeza katika sekta za viwanda, nishati na miundombinu.
