Nora Damian
Mkutano wa viongozi waandamizi wa Chama cha ACT Wazalendo uliopangwa kufanyika leo umezuiliwa.
Mkutano huo ulipangwa kufanyika asubuhi hii katika ukumbi wa Hoteli ya PR Stadium iliyoko Wilaya ya Temeke.
Mtanzania Digital limefika katika hoteli hiyo na kukuta askari polisi wakiwa wametanda nje huku wakizuia watu wasiingie ndani.
“Unakwenda wapi…mkutano umezuiliwa na haruhusiwi mtu yeyote katika eneo hili,” amesema mmoja wa askari polisi aliyekuwa nje ya hoteli hiyo.
Viongozi hao waandamizi wakiongozwa na Kiongozi wa chama hicho, Zitto Kabwe, aliyekuwa Katibu Mkuu wa CUF, Maalim Seif Sharif Hamad, Naibu Kiongozi wa chama hicho, Duni Haji, Mwenyekiti wa chama, Yeremia Maganja, Makamu Mwenyekiti Bara, Shaaban Mambo, Katibu Mkuu, Dorothy Semu na Naibu Katibu Mkuu, Msafiri Mtemelwa walipanga kukutana na viongozi wa Mkoa wa Dar es Salaam.
