Na RAMADHAN HASSAN-DODOMA
WAZIRI Mkuu mstaafu Mizengo Pinda amezitaka taasisi za kifedha zikiwamo benki kuviamini vikundi vya vicoba katika mikopo ili vipate mitaji ya kujiendesha.
Kauli hiyo aliitoa mjini hapa jana wakati akifunga maonesho ya Wiki ya Vicoba yaliyoandaliwa na Shirika la Sedit.
“Wito wangu kwa vyombo vya fedha ikiwa ni pamoja na benki, kuvitumia vicoba kwa kuvipa mikopo ili viweze kujiendesha kwa sababu huku kuna watu wengi ambao wapo tayari kufanya shughuli na wamekuwa wakifanya vizuri,” alisema.
Pia alisema wana vicoba wana wajibu wa kuwa chachu ya mapinduzi ya viwanda kwa kuisaidia Serikali kufikia azma hiyo.
“Ninyi wana vicoba mnaweza kuwa chachu ya mapinduzi ya kilimo kama kila mmoja ataweza kutimiza wajibu wake, ila mimi nina imani na ninyi. Niwatie moyo fumbeni masikio tutapita tu,” alisema.
