Mwandishi Wetu -Singida
KUTOKANA na mvua kubwa za masika zinazoendelea kunyesha Bodi ya Maji Bonde la Kati imewataka wamiliki wote wa mabwawa yote ya tope sumu kuhakikisha wanadhibiti maji kuweza kusambaa kwenye mazingira kwa kuweka miundombinu thabiti.
Pamoja na hilo wametakiwa kuboresha miundombinu iliyopo ili kutoruhusu maji yenye sumu kufika kwa wananchi.
Akizungumza na waandishi wa habari mkoani hapa mwishoni mwa wiki, baada ya kukagua athari za mafuriko kutokana na kujaa kwa maziwa ya Kindai, Munang na Singidani, Ofisa wa Maji Bonde la Kati, William Mabula, alisema kwa yeyote atakayekaidi agizo hilo atachukuliwa hatua kali.
“Wamiliki wote wa mabwawa ya maji na yote ya tope sumu hakikisheni mnadhibiti maji kuweza kusambaa kwenye mazingira kwa kuweka miundombinu thabiti ili kutoruhusu maji yenye sumu kufika kwa wananchi,” alisema Mabula.
Aidha, Mabula aliwataka wananchi wote wakiwemo wamiliki wa mabwawa ya maji na mabwawa ya tope sumu kuchukua tahadhari kwa kuzingatia matangazo ya utabiri wa hali ya hewa yanayoendelea kutolewa kuhusu mvua hizo zinazoendelea kunyesha kwa kasi kote nchini.
Alisema mvua hizo zinaweza kusababisha mabwawa kujaa maji zaidi ya uwezo wake hivyo kutishia usalama wa wananchi, mali zao na mazingira kwa ujumla. Kujaa kwa mabwawa hayo kunaweza kusababisha yakapasuka au kutiririsha maji katika mikondo isiyo rasmi na madhara yake yanaweza kuleta mafuriko katika vijiji, barabara, madaraja, na kuharibu miundombinu mingine.
Pamoja na mambo mengine, ofisa huyo aliwashauri kwa kuwakumbusha wamiliki wote wa mabwawa ya maji kusafisha utoro wa maji, kuimarisha tuta la bwawa kwa kuondoa miti yenye mizizi na vichuguu juu ya tuta, kuziba matoleo yote yanayotumika kutolea maji wakati wa kiangazi na kutunza uoto wa asili ili kudhibiti uingizaji wa mchanga kwenye bwawa.
Aidha aliwatahadharisha wananchi wote wanaoishi chini ya utoro wa maji wa mabwawa na wale wanaoishi kuzunguka migodi kuchukua tahadhari ya kupata mafuriko kutokana na kipindi hiki mabwawa mengi kujaa maji zaidi ya uwezo wake.
“Lakini kwa mujibu wa sheria nawakumbusha wamiliki wote wa mabwawa kuwasilisha mipango ya usalama wa mabwawa na mafuriko kwa mkurugenzi wa rasilimali za maji ili kukabili dharula itakayoweza kutokea kutokana na mvua za masika zinazoendelea kunyesha,” alisema Mabula
