NA KULWA MZEE, DAR ES SALAAM
UPANDE wa Jamhuri katika kesi ya uhujumu uchumi inayowakabili vigogo wa kampuni ya kufua umeme ya Independent Power Limited (IPTL), Harbinder Singh Sethi na James Rugemarila, umetakiwa kukamilisha upelelezi ili hatma ya kesi hiyo ijulikane.
Jamhuri ilitakiwa kufanya hivyo jana na Mahakama ya Hakimu Mkazi Kisutu mbele ya Hakimu Mkazi Mkuu, Huruma Shaidi wakati kesi hiyo ilipokuwa ikitajwa. Jamuhuri ilisema upelelezi haujakamilika.
Wakili wa Serikali Mwandamizi, Kishenyi Mutalemwa alisema kesi hiyo ilipangwa kwa ajili ya kutajwa na kwamba upelelezi haujakamilika.
Wakili wa Rugemarila, Didas Respicius alieleza   kuwa sera ya mahakama ni mashauri yasikilizwe na kutolewa uamuzi kwa wakati.
Alidai wanashangaa kila kesi inapokuja upande wa mashtaka unaomba tarehe ya kuitaja kesi kwa zaidi ya mwaka sasa, wakati washtakiwa wanateseka mahabusu.
Akijibu hoja hiyo, Wakili Kishenyi alidai  wataendelea na upelelezi ili pande zote mbili zipate haki sawa.
Baada ya kusikiliza hoja za pande zote mbili, Hakimu Shaidi aliutaka upande wa mashtaka ujitahidi kukamilisha upelelezi  hatma ya kesi ijulikane.
Mahakama iliahirisha kesi hiyo hadi Oktoba 11 mwaka huu kwa ajili ya kutajwa.
Washtakiwa hao wanakabiliwa na mashtaka 12 ya uhujumu uchumi kwa kula njama, kujihusisha mtandao wa uhalifu, kighushi, kutoa nyaraka za kughushi, kujipatia fedha kwa njia za udanganyifu, kutakatisha fedha na kuisababisha hasara ya Dola za Marekani 22, 198,544.60 na Sh 309,461,300,158.27.
