Na Esther Mnyika, Mtanzania Digital
Rais Mstaafu, Dk. Jakaya Kikwete, amezindua Kampeni maalum ya mpango wa kitaifa wa kuongeza kasi ya kupunguza vifo vya watoto wachanga, kuthamini huduma ya watoto wachanga nchini.
Uzinduzi huo umefanyika leo Novemba 17, 2023 jijini Dar es Salaam ambapo Ifakara Health Institute na Hospitali ya KCMC wanaadhimisha siku ya watoto wanaozaliwa kabla ya wakati duniani.
Hiyo ni baada ya kikao cha majalada cha Newborn Essential Solutions and Technologies (NEST360), kilichokutanisha wadau muhimu wa kitaifa na kimataifa.
Dk. Kikwete amesema mpango huo wa kuongeza kasi unaashiria mwitikio wa haraka wa serikali , ukichochewa na ushahidi wa lazima uliowasilishwa wakati wa kikao kilichoongozwa na wataalam kutoka timu ya NEST360.
“Wataalam walishughulikie kwa uharaka wa suala hilo na kutoa maarifa kuhusu hatua zilizochukuliwa na NEST360, lengo lao ni kukuza ushirikiano ili kuhakikisha hakuna mtoto aliyekufa au kukabiliwa na vifo wakati wa kuzaliwa,” amesema Dk. Kikwete.
Amesema hakuna mwanamke katika bara la Afrika anayepaswa kupoteza maisha yake wakati wa kujifungua na hakuna mtoto anayekufa.
“Duniani kote, wanawake 300,000 wanakabiliwa na hali hii mbaya huku wakipoteza maisha kila mwaka. Kwa idadi kubwa ya kila mwaka ya vifo milioni tisa hutokea kati ya wanawake na watoto ulimwenguni kote. Afrika inabeba mzigo mkubwa zaidi, kwani inachukua 13% ya idadi ya watu ulimwenguni,” ameeleza.
Amesema katika mkutano ujao kila mdau atoe taarifa ya maendeleo yake kuhusu agizo la Rais Dk.Samia Suluhu Hassan la kila hospitali nchini Tanzania kuwa na kitengo cha kulea watoto wachanga.
Naye Naibu Katibu Mkuu Wizara ya Afya, Dk. Grace Magembe, aliwasilisha mpango huo kwa kuangazia maeneo manne muhimu ya kuzingatia, kwanza kuanzisha vitengo vya kulelea watoto wachanga visivyopungua 350 nchini kote.
Amesema katika hospitali za serikali na za binafsi, utoaji wa zana na vifaa, uimarishaji wa uwezo kupitia mafunzo, mpango unaotakiwa kutekelezwa kwa uaminifu na kasi ili kukidhi watoto wanaohitaji huduma za afya katika ngazi mbalimbali.
“Majadiliano haya yanawiana na juhudi za kimataifa za kufikia malengo ya Maendeleo Endelevu (SDG) mwaka wa 2023, na kusisitiza umuhimu wa juhudi shirikishi za kupambana na vifo vya watoto wachanga,” amesema Dk. Magembe.
Siku ya watoto wachanga duniani, inayoadhimishwa Novemba 17 kila mwaka, inalenga kuongeza uelewa wa kuzaliwa kabla ya wakati na kutatua changamoto zinazowakabili watoto hao.
Newborn Essential Solutions and Technologies (NEST360) ambayo inatekelezwa nchini Tanzania na Taasisi ya Afya ya Ifakara na washirika ni muungano wa kimataifa uliojitolea kupunguza vifo vya watoto wachanga kwa asilimia 50 katika hospitali wanazofanya nazo kazi nchini Tanzania, Kenya, Malawi na Nigeria.
