Na Mwandishi wetu, Rukwa
Halmashauri za Mkoa wa Rukwa zimetakiwa kutumia fedha za Serikali Kuu na makusanyo ya ndani kukamilisha miradi ya maendeleo kwa kuzingatia thamani ya fedha, ikiwamo ujenzi wa shule, hospitali na miradi ya maji katika ubora.
Agizo hilo limetolewa na Mkuu wa Mkoa wa Rukwa, Joseph Mkirikiti, wakati alipofanya ziara ya kikazi kukagua miradi ya maendeleo katika Halmashauri ya Wilaya ya Sumbawanga ikiwa na lengo la kufuatilia utekelezaji wa kazi za Serikali tangu alipoteuliwa kuongoza mkoa huo.
“Sasa Serikali imepunguza mzigo kwa halmashauri kwa kulipa posho za madiwani hivyo tunategemea kuona fedha iliyokuwa ikilipwa kwao ikitumika kukamilisha miradi ya maendeleo kwenye kata na vijiji,“amesema Mkirikiti.
Mkirikiti ambaye aliambatana na Mkuu wa Wilaya ya Sumbawanga Sebastian Waryuba, wakiwa kwenye mradi wa ujenzi wa shule mpya ya kata kijiji cha Kalumbaleza walijionea madarasa sita yaliyofikia hatua ya renta kwa gharama ya sh 11.5 milioni ikiwa ni nguvu za wananchi.
Ameagiza Halmashauri ya Wilaya ya Sumbawanga kubadili utaratibu na kukamilisha ujenzi wa shule moja kwa wakati badala ya kwenda na miradi yote.
“Halmashauri wekeni kipaumbele kukamilisha ujenzi wa maboma ya shule zote tano kabla ya Desemba mwaka huu kwa kuanza na shule moja kila mwezi, hivyo viongozi kazi yenu ni kuhamasisha na kuwatambua wadau na wananchi ili wachangie nguvu na rasilimali fedha kukamililisha ujenzi huo” amesema Mkirikiti.
Katika ukaguzi wa mradi wa maji uliogharimu sh 102 milioni, amebaini tatizo la uharibifu wa mazingira kwenye chanzo cha maji ambayo ni safu za milima.
