Na JENNIFER ULLEMBO
MSANII wa muziki wa kizazi kipya nchini, Rehema Chalamila ‘Ray C’, amemtolea maneno makali mwimbaji Faustina Charles ‘Nandy’ na kumtaka kutotumia nyimbo zake anapopanda jukwaani kwenye matamasha yake mbalimbali.
Ray C alitumia ukurasa wake wa mtandao wa kijamii wa Instagram kuandika ujumbe huo huku akimsisitiza Nandy kutumia nyimbo zake binafsi.
“Bado sijafa, kama watu wanaona umuhimu wa sauti yangu kwenye kazi mbalimbali ni vema nikaitwa mwenyewe na kushirikishwa, hii ni mara ya mwisho natoa onyo kwa Nandy,” aliandika Ray C.
Alisema kuwa hiyo si mara ya kwanza kwa Nandy kutumia nyimbo zake kinyume na maamuzi yake, hivyo ni bora kila mtu akafanya kazi zinazomhusu.
