NAIROBI, KENYA
VIONGOZI wa upinzani wa Muungano wa NASA, wamebakiziwa mlinzi mmoja kila mmoja baada ya Jeshi la Polisi kuwanyang’anya walinzi wengine kwa kile ilichodai kuwapangia majukumu mengine.
Kwa mujibu wa taarifa ya Polisi ya Septemba 25 iliyoandikwa kwa niaba ya Naibu Inspekta wa Polisi Benson Kibue, maafisa wote wa polisi ambao ni walinzi wa viongozi wa zamani wanatakiwa kurejea katika majukumu yao ya kawaida.
“Kutokana na upungufu wa maafisa wa polisi katika kutoa huduma kwa umma na kutokana na ongezeko la mahitaji kwa sababu ya changamoto zilizoongezeka, imekuwa muhimu kuchukua hatua,” barua hiyo iliyoandikiwa kwenda kwa makamanda wa polisi katika maeneo ya kaunti imesema.
Pia, viongozi waliopoteza wakati wa uchaguzi mkuu uliopita wakiwemo maseneta na wabunge wameathiriwa na hatua hiyo.
“Tunawaamrisha maafisa wote wanaolinda wabunge, maseneta na waziri mkuu wa zamani, aliyekuwa makamu wa rais na aliyekuwa naibu wa waziri mkuu kurudi,” ilisema taarifa hiyo.
Iliongeza kuwa Raila Odinga, Kalonzo Musyoka na Musalia Mudavadi watabakia na mlinzi mmoja binafsi, na mmoja wa nyumbani atakayelinda usiku pekee.
Hiyo pia inamaanisha wabunge na maseneta wa zamani watabakia na mlinzi mmoja kuambatana na amri hiyo.
Wakenya wote walio na walinzi wa serikali wasioidhinishwa na Kamati ya Taifa ya Ushauri wa Usalama (NSAC) lakini wakiwa na idhini ya moja kwa moja kutoka Polisi pia wameondoshwa.
