Raymond Minja, Iringa
Mkuu wa wilaya ya Kilolo Asia Abdallah, amepiga marufuku wajawazito kutozwa faini pindi waendapo kujifungua kwenye zahanati kwani kufanya hivyo ni kwenda kinyume na sera ya afya na kumuongezea mzigo mwananchi.
Marufuku hiyo imekuja mara baada ya mmoja wa wakinamana wa Kijiji cha Wangiwete kata ya Masisiwe wilayani humo Ageria Abel kutoa kilio hicho kwa mkuu huyo wa wilaya wakati wa ziara yake ya kata kwa kata na kijiji kwa kijiji ili kusikiliza na kutatua kero za wananchi.
“Mkuu wa wilaya tunashukuru kwa kuja umejionea mwenye miundombinu ya barabara ilivyo mibovu sisi akina mama sio kwamba tunapenda kujifungulia nyumbani ila uchungu unakushika unaita gari mpaka ifike tayari mama ashajifungua na ukimpeleka kituoni baadae analipishwa faini tunakuomba utusaidie, “amesema Abel.
Abdallah amesema faini hiyo ambayo wamekuwa wakilipishwa wakinamama hao pindi wanapochelewa kufika kituo cha afya kwa ajili ya kujifungua haiko kisheria hivyo inapaswa kuachwa.
“Mtendaji nakuagiza kuanzia leo ni marufuku kuwatoza wajawazito hiyo siyo sera ya afya, mazingira sio rafiki ile zahanati yetu pale ambayo wanapata huduma akinamama hawa naamini mambo haya yatakwisha na huduma ya kujifungua,matibabu kwa wazee kuanzia miaka 60 na watoto chini ya miaka mitano ni bure,”amesema.
Hata hivyo Abdallah amewataka wananchi hao kuendelea kujenga majengo ya zahanati na shule ili serikali iweze kumalizia na kuleta watumishi kwa manufaa ya kizazi cha sasa na cha baadae na hospitali ya wilaya ya Kilolo itakapokamilika changamoto ya afya na vifo vya wajawazito na watoto itakwisha kwani watapata huduma karibu.
