Na Ramadhan Hassan,Dodoma
Waziri wa Mifugo na Uvuvi, Mashimba Ndaki amelitaka Baraza la Wafanyakazi sekta ya uvuvi kusimamia ushirikishwaji wa watumishi katika utendaji kazi wa kila siku kwani kwa kufanya hivyo watapunguza manung’uniko huku akisisitiza umuhimu wa kusimamia uadilifu,uaminifu na nidhamu kwa watumishi wa umma.
Kauli hiyo ameitoa leo, Jumatatu Mei 10, mwaka huu, jijini Dodoma wakati akifungua Baraza la Wafanyakazi sekta ya Uvuuvi ambapo Waziri Ndaki amesisitiza juu ya umuhimu wa watumishi kushirikishwa katika utendaji kazi wa kila siku ambapo amedai kwa kufanya hivyo manung’uniko yatapungua.
“Ningependa kusisitiza juu ya umuhimu wa ushirikishwaji wa watumishi katika ufanyaji kazi katika vitengo vyote, sisi wote tunajua ushirikishwaji ni jambo la msingi mahali pa kazi, hasa kwenye mambo yanayohusiana na hizo idara na taasisi na vitengo vyetu tukiwashirikisha wafanyakazi tutapunguza manung’uniko.
“Maana kama kuna jambo kubwa tunaliamua tunalipitisha,basi wakati wa utekelezaji hatulaumiani sana kwa sababu wote tumehusika na tumeshirikishwa.Naelewa tunafahamu umuhimu wa jambo hili lakini pia,sheria inatutaka tufanye hivyo. Rai yangu kwenu juu ya jambo hili tuendelee kushirikishana kwenye mambo muhimu na yanayotuhusu kama wafanyakazi kabla ya kufikia uamuzi ili tufikie uamuzi kwa pamoja
“Tukifanya hivyo itasaidia sana kwenye mambo mengi yanayohusu masilahi yetu na ustawi wetu mahali pa kazi na yanayohusu mipango yetu itasaidia sana kwenda pamoja na kuwa a mwelekeo mmoja na kwenda kwa umoja,”amesema Ndaki.
Pia, amewataka viongozi wa baraza hilo kusimamia nidhamu pamoja na kuchukua hatua pindi yanapotokea mambo ya ukosefu wa nidhamu mahala pa kazi.
“Viongozi kwenye ngazi zote tunatakiwa kusimamia na kuchukua hatua,inapotokea mambo ya kinidhamu ya watumishi na watendaji wanapokuwa yameenda sivyo lazima viongozi wa ngazi ya idara, taasisi,kitengo,wizara lazima tusimamie ipasavyo kwa sababu kutofanya hivyo ni kinyume cha mkataba wa huduma kwa wateja pamoja na mkataba mwingine wa huduma bora kwa wafanyakazi.
Aidha, aliwataka kusimamia mkataba wa huduma bora kwa wafanyakazi ambao una mambo ya msingi kama kutochelewa kazini,kukosa uadilifu na mambo ya kutoa na kupokea rushwa kwani hayo ni masuala ya msingi.
“Niwaombe sana ndugu wajumbe masuala ya uadilifu, uaminifu,nidhamu kazini ni masuala ya msingi sana uzuri ni kwamba kuna sheria na taratibu na kanuni zinazotuongoza katika mambo haya, kwahiyo tunapaswa kuziangalia na kuziheshimu ili kwamba tuweze kutoa huduma kwa wananchi wakati kwa kadri tunavyotegemewa.
“Mimi pia kama Waziri ambaye nasimamia shughuli za uendeshaji na utendaji kazi wa kila siku wa Wizara haitoshi tu kwamba mimi sihusiki na masuala ya kinidhamu ya kimaadili na uadilifu lakini natakiwa kuhakikisha kwamba Wizara kwa ujumla inaendana na masuala ya nidhamu kazini inaendana na masuala ya uadilifu na uaminifu kazini,”amesema.
Pia, amewataka wafanyakazi hao kujadili kwa ukamilifu bajeti ya Wizara ya Mifugo na Uvuvi kwa mwaka wa fedha 2020-2021 na mpango wa bajeti kwa mwaka wa fedha sekta ya uvuvi 2021-2022.
“Mtapitia taarifa ya utekelezaji wa bajeti kwa mwaka wa fedha 2020-2021 na mpango wa bajeti kwa mwaka wa fedha sekta ya uvuvi 2021-2022,nitumie fursa hii kuwaomba kujadili kwa ukamilifu taarifa zote hizo mbili kwa uwazi kwa kina kisha mtoe maoni yenu,”amesema.
Awali, Mwenyekiti wa Baraza hilo, Dk. Rashid Tamatama amesema kikao hicho kitakuwa na agenda za wajibu wa mwajiri,Tughe na wajumbe wa baraza mahala pa kazi pamoja na agenda kuhusu taarifa ya utekelezaji wa bajeti kwa mwaka wa fedha 2020- 2021 na mpango wa bajeti kwa mwaka 2021-2022.
“Kikao cha leo ni cha kwanza kutokana na kwamba sekta ya uvivi ni kama ilikuwa imeanzishwa upya kwa kuwa kulikuwa kuna upungufu mkubwa wa watumishi hivyo katika kipindi cha mwaka 2018- 2020 kulikuwa kuna jitihada mbalimbali za kukamisha taratibu za kuwa na baraza ikiwemo kuandaa mkataba wa hali bora kwa wafanyakazi na kutiwa saini na Tughe,”amesema.
