Na ABDUL MKYENGE
BAADA ya kukaa miezi miwili bila kufunga bao katika kikosi cha timu ya Taifa Tanzania ‘Taifa Stars’ na klabu ya KRC Genk ya Ubelgiji, hatimaye Mbwana Samatta juzi usiku amevunja ukimya kwa kufunga bao moja katika ushindi wa mabao mawili iliyopata klabu yake dhidi ya Club Brugge.
Mchezo huo wa Ligi Kuu Ubelgiji (First Division A) uliofanyika kwenye uwanja wao wa nyumbani, Luminus Arena, ulimshuhudia Samatta ambaye ni nahodha wa Taifa Stars akifunga bao hilo dakika za majeruhi na kufuta ukame huo wa muda mrefu.
Bao la kwanza la Genk liliwekwa kimiani na Ruslan Malinovskiy kipindi cha kwanza, huku la pili likifungwa na Samatta na kuifanya timu yake ifikishe pointi 17 na kushika nafasi ya nane kwenye msimamo wa ligi hiyo.
Ushindi huo wa Genk unakuwa wa pili mfululizo kikosini hapo, baada ya mchezo uliopita Genk kupata ushindi wa bao 1-0 timu ya Anderlecht ugenini.
Kabla ya Samatta kufunga bao katika mchezo huo dhidi ya Club Brugge, alipitisha michezo tisa bila kufunga, huku michezo miwili kati ya hiyo ikiwa ya timu ya taifa ambapo Stars ilicheza michezo ya kimataifa ya kirafiki dhidi ya timu za taifa Malawi na Botswana.
Kesho timu ya Samatta itakuwa ugenini kucheza dhidi ya Kortrijk katika mwendelezo wa mikikimikiki ya ligi kuu ya soka nchini humo.
