Na Mwandishi Wetu, Mtanzania Digital
Shirika la Umoja wa Mataifa la Idadi ya Watu na Afya ya Uzazi(UNFPA) limetoa vifaa vya utu ili kuwezesha usafi wa kibinafsi kwa wanawake na wasichana walionusurika kwenye maporomoko ya matope huko Hanang mkoani Manyara.
Vifaa hivyo ni pamoja na taulo za kike, sabuni ya kuogea, jozi nyingi za nguo za ndani, sabuni ya kufulia, dawa ya meno na mswaki, vyote vikiwa vimepakiwa ndani ya ndoo ya lita 20 ambapo kwa mujibu wa UNFPA kila ndoo moja inakidhi mahitaji maalum ya wanawake na wasichana.
Taarifa ya UNFPA iliyotolewa leo Deselba 21, imebainisha kuwa wanawake na wasichana ni miongoni mwa watu 5,600 walionusurika katika mvua kubwa iliyonyesha Desemba 3, mwaka huu na kusababisha mafuriko na maporomoko ya matope huko Hanang.
Pamoja na mali na kaya zilizosombwa na mafuriko, wanawake ambao walinusurika huvumilia uhaba wa afya ya uzazi na vifaa vya usafi wa kibinafsi.
UNFPA imekabidhi msaada wa vifaa 1,200 vya hedhi mjini Hanang ambavyo vimepokelewa kwa niaba ya Serikali na Kanali Selestine Masalamado, Mkurugenzi Msaidizi wa Operesheni na Uratibu katika Idara ya Udhibiti wa Maafa Ofisi ya Waziri Mkuu.
“Mbali na usalama na ulinzi, wanawake na wasichana walioathiriwa na mafuriko na kuporomoka kwa matope lazima wapate huduma bora ya afya ya uzazi na uzazi wakati wanapohitaji,” amesema Mark Bryan Schreiner, Mwakilishi wa UNFPA nchini Tanzania.
Itakumbukwa kuwa idadi rasmi ya vifo kutokana na mafuriko hayo ni 88, kufikia Desemba 11, mafuriko hayo yalijeruhi watu 139 na kusomba takriban ekari 750 za mazao.
Msaada huo wa UNFPA unajiunga na mfumo wa Umoja wa Mataifa wa kukabiliana na dharura kwa Hanang kwani itakumbukwa kuwa Mpango wa Chakula Duniani(WFP), ulipeleka chakula; Shirika la Afya Ulimwenguni (WHO) lilitoa vifaa vya haraka vya kudhibiti kipindupindu na vifaa vingine huku UNICEF ikipeleka maji, vyoo na vifaa vya usafi.
“Zaidi ya hayo, mfumo wa Umoja wa Mataifa unatoa msaada wa kiufundi kwa majibu.
“Wakati Tanzania inakabiliana na athari za mvua zilizo juu ya wastani katika maeneo tofauti, UNFPA inaahidi kuendelea kutoa msaada,” amesema mwakilishi huyo wa UNFPA.
