KULWA MZEE-DAR ES SALAAM
MSANII wa filamu nchini, Wema Sepetu anaekabiliwa na mashtaka ya kuchapisha video ya ngono ameangua kilio baada ya Mahakama ya Hakimu Mkazi Kisutu kumwamuru kwenda mahabusu gerezani kwa siku saba akisubiri uamuzi wa mahakama hiyo wa kumfutia dhamana ama la.
Uamuzi huo ulitolewa jana mbele ya Hakimu Mkazi, Maira Kasonde baada ya mshtakiwa huyo aliyekuwa anadaiwa kuruka dhamana kufikishwa mbele yake.
Wakili wa Serikali, Glory Mwenda alidai mshtakiwa alikamatwa na kufikishwa mahakamani baada ya kuruka dhamana na mahakama kutoa hati ya kumkamata Juni 11 mwaka huu.
Hakimu Maira alisema mshtakiwa hakufika mahakamani Mei 14 mwaka huu bila taarifa na Juni 11 pia hakufika hivyo alimtaka kujieleza kwanini hakuhudhuria mahakamani na kwanini asifutiwe dhamana.
Akijieleza, Wema alidai Mei 14 alisafiri kikazi kuelekea Morogoro akamjulisha Wakili wake, Ruben Simwanza na Juni 11, mwaka huu, alifika mahakamani lakini aliumwa.
“Nilishindwa kupanda mahakamani, ninapofika kwenye siku zangu huwa napata maumivu makali, nilienda kuchoma sindano ya maumivu, nikapumzika kisha nikarudi nyumbani.
“Nilienda kuchoma sindano Hospitali ya Mbuyuni karibu na makaburi ya Kinondoni, nilifanyiwa upasuaji wa kizazi India hivyo maumivu yanatokea kila mwezi, naomba msamaha Mheshimiwa,” aliomba Wema.
Akijibu Wakili wa Serikali, Glory Mwenda alidai ni kweli mshtakiwa hakufika mahakamani kwa siku hizo lakini siku zote za kesi amekuwa akitoa taarifa hivyo aliiomba mahakama impe onyo kwa kutohudhuria sababu imeleta usumbufu.
Glory alidai siku nyingine asipofika wadhamini wake wafike kumwakilisha. Wakili wake, Ruben aliomba Mahakama imsamehe mteja wake kwa usumbufu uliojitokeza na kuahidi kwamba hautajirudia.
“Tunaomba busara ya mahakama mshtakiwa abaki na dhamana yake,”alidai Ruben.
Hakimu Kasonde baada ya kusikiliza hoja za pande zote alisema atazizingatia pamoja na kiapo cha Wema kilichowasilishwa mahakamani hapo.
“Siwezi kutoa uamuzi leo nina kazi nyingine, uamuzi nitatoa Juni 24 mwaka huu, kwa kuwa uamuzi ni ama mshtakiwa afutiwe dhamana ama la ni vyema kwa busara wakati tukisubiri uamuzi mshtakiwa akae rumande hadi tarehe hiyo,” alisema Hakimu Kasonde.
Awali hati ya kumkamata Wema ilitolewa Juni 11 baada ya upande wa mashtaka ukiongozwa na Wakili Silvia Mitanto kudai kwamba mshtakiwa hayuko mahakamani na hakuna taarifa yoyote.
Wakili wa utetezi, Ruben Simwanza, alidai mshtakiwa alifika Mahakamani lakini kaumwa hivyo ameshindwa kuingia katika chumba cha Mahakama.
Akitoa uamuzi Hakimu Maira alisema Mahakama inatoa hati ya kumkamata mshtakiwa kwa sababu kama alifika alishindwa nini kuingia mahakamani.
Wema anakabiliwa na shtaka moja la kuchapisha video ya ngono katika mtandao wa kijamii. Wema anadaiwa kutenda kosa hilo kati ya Oktoba 15, 2018 katika maeneo mbalimbali ya Jiji la Dar Es Salaam, ambapo alisambaza video za ngono kupitia akaunti yake ya Instagram, picha ambazo inadaiwa kuwa haina maudhui.
Alidai Wema ambaye ni mkazi wa Mbezi Salasala, anamiliki mtandao wa kijamii wa Istagramu wenye jina la Wemasepetu.
Alidai siku hiyo ya tukio, mshtakiwa alirekodi video ya ngono ambayo haina maudhui kupitia simu yake ya kiganjani, akitumia laini ya Vodacom.
Baada ya kurekodi video hiyo, Oktoba 25, 2018, mshtakiwa aliisambaza katika akaunti yake ya Istagram, wakati akijua kufanya hivyo ni kinyume cha sheria.
Video hiyo aliyorekodi Wema, ilikuwa inaonyesha kuwa Wema alikuwa ananyonyana ndimi (denda) na mwanaume, huku akijua kuwa kitendo hicho ni kinyume na maadili ya Tanzania.
Inadaiwa Oktoba 25, 2018 maofisa wa Mamlaka ya Mawasiliano Tanzania (TCRA), waliiona video hiyo na kuripoti tukio hilo katika kituo cha Polisi Kijitonyama.
Upande wa mashtaka ulidai kuwa, baada ya maofisa wa TCRA kuripoti tukio hilo, Wema alikamatwa Oktoba 29, 2018 na kupelekwa katika kituo cha Kikuu cha Polisi (Central), ambapo alihojiwa na polisi.
