29.2 C
Dar es Salaam
Monday, October 18, 2021

Wasichana wa kazi Kipunguni waanza kupatiwa mikataba ya ajira

Na Mwandishi Wetu, Mtanzania Digital

Baadhi ya wasichana wa kazi za nyumbani katika Kata ya Kipunguni Jijini Dar es Salaam wameanza kupatiwa mikataba ya kazi na waajiri wao ili kulinda usalama wa ajira zao.

Hatua hiyo ni matokeo ya mradi wa Wezesha Uelewa wa Haki zuia rusha ya ngono ndani ya jamii unaotekelezwa na Sauti ya Jamii Kipunguni na kufadhiliwa na Women Fund Tanzania Trust.

Kupitia mradi huo Sauti ya Jamii Kipunguni iliendesha mafunzo kwa wafanyakazi wa kazi za majumbani juu ya uelewa wa haki, madhara ya rushwa ya ngono na kuripoti vitendo vya ukatili kwenye mamlaka husika.

Mmoja wa wasichana aliyepatiwa mkataba Ramla Nassoro (18) amesema baada ya kuhudhuria semina hiyo alimshirikisha mwajiri wake ambaye alikubali kumpatia mkataba wa kazi.

Ramla Nassoro akiendelea na majukumu yake.

“Mkataba nimeridhika nao na nimefarijika kwa sababu sasa hivi naishi na kufanya kazi kwa uhuru, najua haki zangu na majukumu yangu. Nawashauri waajiri wengine kuwapa mikataba ya kazi wafanyakazi wao,” amesema Ramla.

Mwajiri wa msichana huyo, Asha Dilangale, amesema alihamasika kumpa mkataba mfanyakazi wake baada ya kuelimishwa kuhusu umuhimu wa mkataba wa kazi kwani unamlinda mfanyakazi na mwajiri pia.

“Nilimruhusu msichana wangu kwenda kupata mafunzo alivyorudi alinieleza aliyojifunza akaniambia kwamba tunatakiwa tuishi kimkataba. Mimi niliona ni jambo sahihi nilimchukulia kama mfanyakazi mwingine nikaamua kumuandalia mkataba,” amesema Asha.

Aidha amesema anaendelea kuwahamasisha waajiri wengie wenye wasichana wa kazi za ndani waweze kuwapatia mikataba ili waishi kwa amani na uhuru.

Aidha kupitia mradi huo hamasa ya kudai haki imeongezeka ambapo Ratifa Mussa ambaye pia alihudhuria mafunzo hayo amehamasika kwa kuanza kuwapa elimu wasichana wengine waweze kutambua haki zao na kutambua madhara ya rushwa ya ngono.

Kwa upande wake Mkurugenzi wa Sauti ya Jamii Kipunguni, Selemani Bishangazi, amesema walitoa semina ya madhara ya rushwa ya ngono na uelewa wa haki kwa wadada wa kazi 120 kutoka Kata ya Kipunguni.

“Wafanyakazi wa majumbani wana haki ya kuthaminiwa ndiyo maana tunawahamasisha wawe na nguvu ya kupambana na unyanyasaji kwa sababu wengi wanafanya kazi katika mazingira magumu na hawana mikataba ya ajira,” amesema Bishangazi.

Mradi huo unalenga kuendeleza kampeni ya kuzuia rushwa ya ngono kwa wafanyakazi wa kazi za majumbani na wanawake wenye ndoto za kuwa viongozi, umuhimu wa kuripoti vitendo vya ukatili kwenye mamlaka husika na kudai haki na kuwajibika.

Related Articles

LEAVE A REPLY

Please enter your comment!
Please enter your name here

Stay Connected

66,457FansLike
162,310FollowersFollow
522,000SubscribersSubscribe

Latest Articles