Na Clara Matimo, Mwanza
Wanachama Wanawake kutoka Chama Cha Waandishi wa Habari Mkoa wa Mwanza (MPC), wameadhimisha siku yao kwa kufanya harambee ili kupata fedha kwa ajili ya kuanza ujenzi wa ofisi za chama hicho katika eneo la Kata ya Bujashi Kijiji cha Matale Wilayani Magu Mkoani Mwanza.
Harambee hiyo imefanyika baada ya waandishi hao kutembelea eneo hilo na kukabidhiwa hati miliki, kibali cha ujenzi na ramani ya jengo hilo kutoka kwa Mkurugenzi wa Kampuni ya Uendeshaji Ardhi ya Landspecs Developers, Ally Msoya, ambayo imeingia ubia wa kupima na kuuza viwanja vilivyopo kijijini hapo na halmashauri ya Wilaya ya Magu.
Msoya ambaye aliambatana na Diwani wa Kata ya Bujashi, Deleli Mazoya, (CCM), Diwani wa Kata jirani ya Bukandwe, Marco Minzi, pamoja na baadhi ya viongozi wa Serikali ya Kijiji hicho aliichangia MPC mifuko 50 ya saruji huku viongozi hao wakichangia mifuko mitano kila mmoja .
Akizungumza baada ya kukabidhiwa kibali cha ujenzi katika eneo hilo na Diwani Mazoya, Katibu Msaidizi wa MPC, Blandina Chagula, alisema jengo hilo la ghorofa tatu likikamilika litatoa fursa kwa wananchi ambao watapanga vyumba kwa ajili ya kufanya biashara hivyo watajikwamua kiuchumi.
“Pia jengo likikamilika MPC tutapata faida kubwa sana kwa sababu litatuongezea kipato kutokana na wapangaji watakaopanga kwetu, fedha hizo zitatusaidia kuanzisha miradi mingine ambayo itatuinua kiuchumi na kutufanya tuheshimike zaidi ndani ya jamiilakini kubwa zaidi tutaondokana nakudaiwa kodi yapango la ofisi kama ambavyo tunapanga sasa,”alisema.
Baadhi ya wanachama wa MPC, akiwemo Kisali Simba na Rose Jacob, walisema waliamua kuadhimisha siku ya wanawake duniani kwa kuhakikisha wanafanya jambo ambalo litakumbukwa endapo jengo hilo likikamilika ndiyo maana wakaona wafanye harambee ili kupata vifaa vya ujenzi.
“Tunamshukuru Mungu sana wazo letu limeleta matokeo chanya, harambee tumeifanyia eneo hili tena hatujaalika watu wengi zaidi ya viongozi wa eneo hili lakini tumefanikiwa kupata mifuko mingi ya saruji,mchanga na kokoto, kwetu sisi ni faraja, kweli wanawake tunaweza na leo ni mwanzo tutaandaa harambee nyingine ambayo itawashirikisha wadau wetu wengi,”alisema Kisali.
Naye Mwenyekiti wa MPC, Edwin Soko, alisema kitendo kilichofanywa na wanachama hao kimethibitisha kwamba wanawake wanauwezo wa kusimamia msingi wa kujitegemea kwa sababu wamefanikisha upatikanaji wa mifuko 100 ya saruji ambayo itasaidia kuanza kwa ujenzi wa jengo hilo.
“Wito wangu kwa taasisi zote za habari nchini msingi wa waandishi wa habari usimamie katika kumheshimu mwanamke, tuone mwanamke ana haki sawa na mwanaume ndani ya news room, tuone mwanamke ana haki sawa katika ufanyaji wa kazi, tutoe ubaguzi na wanaume tuonyeshe mfano, moja ya malengo ya MPC ni kusimamia usawa wa kijinsia na hilo tunalitekeleza kwa vitendo,”alisema.
