*Rais Samia akiwa Kiongozi Mwanamke pekee
Na Mwandishi Wetu, Mtanzania Digital
Licha ya changamoto zinazolikumba soko la dunia, Tanzania imeendelea kung’ara katika sekta ya uchumi, na kufanikiwa kuingia kwenye orodha ya nchi 10 bora za Afrika kwa Pato la Taifa (GDP) kwa mwaka 2024, kwa mujibu wa ripoti ya Shirika la Fedha Duniani (IMF).
Tanzania, ikiwa na GDP ya dola bilioni 79.87, inaonyesha mafanikio makubwa ya kiuchumi chini ya uongozi wa Rais Samia Suluhu Hassan. Rais Samia, akiwa kiongozi mwanamke pekee miongoni mwa nchi zinazofanya vizuri kiuchumi barani Afrika, ameongoza nchi kwa dira na kujitolea kwa maendeleo jumuishi.
Ukuaji huu wa uchumi umechangiwa kwa kiasi kikubwa na sekta za kilimo, viwanda, na utalii. Sera bora za kiuchumi zimeimarisha uwekezaji na kusaidia kuongeza ajira, huku zikihakikisha ustawi wa wananchi wa kawaida. Kupanda kwa nafasi ya Tanzania kumedhihirisha ustahimilivu na mikakati endelevu inayoweka taifa kwenye mstari wa mafanikio.
Ingawa baadhi ya nchi zinaweza kuwa na takwimu kubwa zaidi za uchumi, kuimarika kwa Tanzania kunathibitisha kuwa ukuaji wake si wa ghafla bali unaongozwa na misingi imara na mipango ya muda mrefu. Hii inatoa matumaini kwa mustakabali wa taifa, ambapo ustawi wa kiuchumi utaendelea kuwafaidi wananchi wote.
