NA MWALI IBRAHIM
BENDI ya muziki wa dansi nchini ya FM Academia ‘Wazee wa Ngwasuma’, imesema kukubalika kwa nyimbo zao katika ziara ya kimuziki waliyoifanya mkoani Tanga na Mtwara zimetoa mwanga mzuri kuelekea katika uzinduzi wa nyimbo zao mpya na albamu yao kwa ujumla.
Msemaji wa bendi hiyo, Kelvin Mkinga, alitaja nyimbo zao mpya kuwa ni ‘Dada wewe’ na ‘Moyo wangu’.
“Nyimbo zetu zimeanza kufanya vizuri kwenye mikoa hiyo na tuna imani zitafanya vizuri kuelekea katika onyesho letu maalumu litakalofanyika sikukuu ya Pasaka Ukumbi wa Arcade, uliopo Mikocheni.
“Kwa sasa tunaendelea kukamilisha nyimbo zitakazokamilisha albamu yetu ambayo tutaizindua muda wowote baada ya kukamilika lakini katika onyesho letu la Pasaka kuna nyimbo mpya tutawaletea mashabiki wetu,’’ alisema Mkinga.
