Amina Omari, Tanga
Ofisi ya Waziri Mkuu, imetoa msaada wa Sh milioni 10 kwa waathirika wa mvua zilizonyesha hivi karibuni wilayani Korogwe mkoani hapa.
Akikabidhi msaada huo kwa Mkuu wa Mkoa wa Tanga Martine Shigela, Mkurugenzi wa Idara ya Uratibu wa Maafa (OWM) Kanali Jimmy Matamwe amesema msaada kwa ajili ya kusaidia kaya ambazo makazi yao yameharibika kutokana na mvua zilizonyesha na kuleta athari mbalimbali ikiwemo uharibifu wa miundombinu.
Ametaja msaada huo kuwa ni mabati 200, magodoro 100, mikeka 200, ndoo 200 na blanketi 200.
“Pamoja na msaada huu, pia tumekuja kukagua hatua za urejeshaji wa hali baada ya maafa ya mafuriko ya mvua mkoani hapa,” amesema.
Awali, Mkuu wa Mkoa wa Tanga, Shigela amemuomba Kanali Matamwe kuwasaidia kuwajengea uwezo kamati za maafa za mikoa na wilaya ili waweze kukabiliana na majanga kwa weledi.
