Na Mwandishi Wetu, Mtanzania Digital
SERIKALI imesisitiza dhamira yake ya kuendelea kushirikiana na washirika na wadau kuongeza juhudi katika mafunzo ya ukunga na elimu ili kuboresha utoaji wa huduma za uzazi nchini.
Hayo yameeleza Mei 5, 2023 jijini Dar es Salaam na Mkuu wa Programu wa Wizara ya Afya, Catherine Joaqim, katika mjadala wa meza ya pande zote wa kuadhimisha Siku ya Kimataifa ya Wakunga.
Amesema kaulimbiu ya mwaka huu ya “Pamoja Tena kutoka Ushahidi hadi Ukweli,” inazungumzia umuhimu mkubwa wa kufanya kazi kwa ushirikiano ili kuziba pengo kati ya ujuzi tulionao kuhusu utunzaji bora wa wakunga na ukweli wa kile kinachopatikana kwa sasa katika sehemu nyingi za dunia.
Kwa mujibu wa Catherine, utafiti unaonyesha kuwa ukunga mmoja wa kitaalamu anaweza kuokoa maisha ya mama na mtoto mchanga kwa asilimia 65, hivyo basi, mafunzo ya ukunga hayaepukiki.
Catherine amesema kuwa serikali itaboresha miongozo na kufungua fursa za ajira mpya za watendaji katika sekta hiyo.
“Moja ya changamoto kubwa zinazokwamisha majukumu ya sekta hii ni ukosefu wa wakunga wenye taaluma, hivyo ili kukabiliana na changamoto hii, Serikali imewekeza kwa kiasi kikubwa katika mafunzo ya ujuzi kwa kada hii ili kuondoa vifo vinavyoweza kuepukika,” amesema Catherine.
Mwakilishi wa Shirika la Umoja wa Mataifa la Idadi ya Watu na Afya ya Uzazi (UNFPA) nchini, Mark Schreiner alisema kwamba ikiwa kila mwanamke mjamzito angepata mkunga aliyefunzwa vizuri, anayejali, itakuwa karibu zaidi na ulimwengu ambapo kila uzazi ni salama.
Amebainisha kuwa mifumo mingi ya afya inaendelea kuwaweka pembeni wafanyakazi wengi wa kike na kuwatendea vibaya wakunga katika suala la malipo, mazingira ya kazi na fursa za kukuza ujuzi.
Amesema madhara ya kutokuwa na wakunga wenye ujuzi wa kutosha yanatisha.
Kwa mujibu wa Schreiner, kila mwaka, wanawake 287,000 duniani hupoteza maisha wakati wa kujifungua; Watoto wachanga milioni 2.4 hufa na wengine milioni 2.2 huzaliwa wakiwa wamekufa.
“Aidha, takwimu zinaonyesha kuwa nchini Tanzania wanawake 8,000 hadi 11,000 hupoteza maisha wakati wa kujifungua kila mwaka (takriban 30 kwa siku) na zaidi ya watoto 40,000 wanaozaliwa hawataona siku yao ya kuzaliwa.
“Nchini Tanzania, UNFPA imeendelea kushirikiana na serikali kupitia Wizara ya Afya Bara na Zanzibar kuimarisha elimu ya ukunga, udhibiti, ushirika na mazingira wezeshi kwa vitendo vya ukunga,” amesema Schreiner.
Uoande wake, Makamu Mwenyekiti wa Chama cha Wakunga Tanzania (TAMA), Lovelucky Mwasha amesema pamoja na kwamba kumekuwa na maendeleo katika miaka ya hivi karibuni, lakini wakunga wengi wakipatiwa mafunzo na kupelekwa vijijini, ni jambo kubwa zaidi na linatakiwa kufanyika ili kuhakikisha kila mwanamke anapata mkunga mwenye ujuzi stahiki wakati wa kujifungua.
Kwa mujibu wa Lovelucky, kwa ujumla nchini Tanzania wakunga wanaohitimu kutoka shule za uuguzi na ukunga wanahitaji mafunzo ya ziada ya huduma na ushauri ili kupata umahiri unaohitajika na kufanya ukunga kwa usalama.
“Kwa hiyo, kwa wakati huu tujikumbushe kwamba si kila anayejifungua ni mkunga,” amesema Lovelucky.
Ameongeza kuwa moja ya mambo muhimu yatakayoamua mafanikio ya jitihada za kuboresha huduma ya ukunga nchini ni ubora wa elimu ya ukunga.
“Tunahitaji kuhakikisha kuwa wanafunzi wakunga wanapata mafunzo bora zaidi, ili wawe na vifaa vya kutosha vya kutoa huduma ya hali ya juu kwa wanawake na watoto wachanga, sio tu kuwapa maarifa na ujuzi unaohitajika bali pia kuwatayarisha kuwa watoa huduma wenye huruma na wenye kujali utamaduni,” amesema Lovelucky.
